第一場、第五班、一○○○米。「跑馬仔」九歲老馬在上手馬房保養得宜，上季同期在此程贏馬，其後亦於季尾階段多取一亞一殿，可見寶刀未老，今季由呂健威接手，已經係第五位訓練此駒的練者，亦好大機會係最後一位，所以肯定馬房會用盡一時，看此駒開操以來備戰工夫正常，埋門亦試埋大閘才跑今仗，準備工夫完整之餘，今仗亦出王牌報名，老馬蓄銳而臨，大有機會一擊即中。
第二場、第四班、一二○○米。「銀城福星」至今三捷全在田草，而且當中兩場屬四班賽，可見今仗移師谷草賺點級數，事實上，此駒雖然已經跑了三十場賽事，但其實只係五歲馬，仍然處於盛年，戰鬥力有升無跌；季內兩戰均在田草千二米落第，但其實前中段走勢不俗，只因牠轉為慢熱，兼且評分高企才未有作為；今仗轉爭谷草對手不強，理應可以贏馬交代。
第三場、第四班、一二○○米。「哥哥仔」上季轉投告廄後，曾經兩度在同程跑獲季軍；今仗已經係季內第三次上陣，多跑之下可望展現出更強的戰鬥力，雖然上仗跑獲第十一名，但其實陣上形勢極差，雖然排六檔起步，但沿途走三疊蝕位，直路上力弱墮退亦屬理所當然之事；經過兩場熱身後狀態已冒起，馬房部署相隔不足一周匆匆再戰，擺明車馬急於求功，有條件由蟲變龍。