馬迷都知道贏開的馬狀態有保證，所以操練都毋須太辣，但蔡約翰馬房上季最佳新馬獎得主「首映」，九月中勝出沙田直路賽後，不但例課無缺，上周二更來一課泥地大閘，擺明要力谷狀態。此駒今晚角逐谷草二班一千米，爭勝決心之大可見一斑。現年才四歲的「首映」，剛周二那課大閘在雷神莫雷拉胯下一放到底，末段扣實冇騎過，取勝姿態輕鬆，可以話大把在手，戰鬥力明顯仍在不斷提升中。蔡約翰咁積極催谷「首映」，看似今仗不容有失，其實可理解。「首映」出道以來最擅長係快活谷一千米，此程跑過四次得三冠一亞，亞軍之役僅負頸位不敵「財神」，純因當時以三歲馬身份，讓年長嘅「財神」十九磅，否則冇可能會輸。如果「首映」今日一戰贏唔到，再翻查下一次谷草二班一千米最快都要等到二○一八年先有賽程，又難怪蔡約翰要狂操「首映」，實在爭勝機會真係一閃即逝。