近期打開一些社交網站，就會被「雲絲仙子」創出廿一連捷佳績嘅消息洗版。呢匹澳洲馬后稍後將會力爭覺士盾三連霸，如果贏馬距離又係贏咁遠，有機會反先泥地王「霸道駒」成為年終全球評分一姐。
「雲絲仙子」實力勁還勁，不過相信都會有好多朋友會為已篤定成為今年歐洲馬王嘅「成全寶」感到不值，事關呢匹三歲馬女今年已經五連勝一級賽，而其中英皇錦標同凱旋門大賽更加公認係全歐洲，甚至全世界最高水準嘅哩半賽事，偏偏喺最新一期國際評分上就以一百二十八分落後於一百三十二分的「雲絲仙子」。支持「成全寶」一方，就會覺得「雲絲仙子」本身贏嘅都係澳洲本土大賽；而「雲絲仙子」嘅粉絲亦會話連贏二十一場始終難度極高，況且「成全寶」成日都有佢擅長嘅濕慢地之助。到底兩匹馬后邊匹應該值更高分？呢樣嘢真係由天光拗到天黑都唔會有結論，所以希望見到「雲絲仙子」遠征衝出澳洲證明自己實力。不過所謂評分及排名都係只供參考，並不完全反映馬匹實力，有時評分較低馬匹，進步起上嚟隨時勁到你唔信，好似「平湖之星」同「五十五十」兩匹灰馬咁，佢哋嘅實力就算評一百分都有甚強的競爭力，加上持續進步的話，未來將會去到邊個層次，相信都無人可以肯定，大家就不妨拭目以待吧。
另一方面，早前澳洲單方面禁止香港馬匹出入境，但當地拍賣會又點可以唔歡迎來自香港的買家，就好似剛周二及周三兩日在澳洲黃金海岸舉行已受訓兩歲馬拍賣會，唔少香港練馬師同馬主均前往入貨，在首日成功出售的兩歲馬之中，有十匹是由香港買家購入，而成交額達到一百五十萬澳元，折合港紙約九百萬港元，佔暫時總成交額四分一，可見香港買家的分量。本地練馬師文家良、葉楚航及蘇偉賢均有入貨，其中文家良以二十七萬澳元（即約一百六十四萬港元）購入了兩匹分別為「情深義重」（All Too Hard）及「佐范尼」（Zoffany）子嗣，前駒在港同父馬有「魅影揚飛」，呢隻馬上周首次登場即擊敗「永旺喜喜」及「君達星」打開勝利之門。後駒就與「安駒」及「良才」等駒同父。葉楚航則以十五萬澳元（九十一萬港元）投得一匹「利得精選」（Redoute's Choice）的子嗣，這匹兩歲年青馬在上月試跑二百米時造出十秒四九的快時間，與當日試跑最快的馬女時間只差一線，估計質素方面應該有番咁上下，未來引入來港服役，前景令人期待。