■Eason大唱粵語歌獻港迷。香港文匯報訊（記者 梁靜儀）陳奕迅一連兩晚假旺角麥花臣場館舉行的《Eason says C'mon in Tour新歌音樂會》，前晚首場演出，老婆徐濠縈、梁漢文、趙學而、陳志雲、郭偉亮和葉佩雯，還有久未露面的甄楚倩等捧場。談到門票被炒貴至7千元，Eason坦言開幾多場都會炒，至於有傳他於明年在港開騷，Eason表示最快要到2019年。
一身便服出場的Eason先唱出新國語專輯的《收心操》、《誰來剪月光》及《之外》。唱完一輪國語新歌後，他說：「我準備咗幾首粵語流行曲，我唔知仲流唔流行，定有冇流行過，起碼我覺得佢哋係，有啲大家未必耳熟能詳，有啲係九幾年，有啲係再之後幾年嘅作品，原來有啲歌詞現在睇返都唔會過時，雖然寫嘅時候係記錄當刻心情，可能人都係鍾意做重複做嘅嘢。」之後唱了一首慢版的《超人的主題曲》，全場拍掌叫好。
取笑老婆唔睬人
唱完幾首粵語歌後，Eason「吹神」上身說：「今日揀啲歌都係好少唱，我隨時都可以唱首《K歌之王》，或者唔好咁舊，隨時唱《無條件》都得。」此時台下有歌迷大嗌：「係咪得㗎？ 」Eason就答她：「隨時都得，但今日唔得，話晒都係大碟宣傳，難得唱晒全隻碟嘅歌，怕冇機會，以下呢首歌都係好好嘅，就似我太太咁。」然後唱出《人生馬拉松》送給台下的老婆徐濠縈。
剪了頭髮的Eason，突然自稱似錢嘉樂，又扮對方瞪大眼，引來台下觀眾大笑。其間有台下觀眾話好想繼續見Eason，Eason笑說：「想咪嚟我屋企囉！不過要問我老婆先，但佢唔睬人㗎，死啦！加重咗囮庤H添，其實佢連我都唔係好睬......講笑啫。」之後唱出最後一首歌《披風》，雖然場館亮着燈，但觀眾仍不願離去，過了一會Eason再次出場，唱出《與我常在》為音樂會劃上句號。
受訪時談到門票被炒貴至7千元，場外亦有操普通話的人兜售門票，Eason聞言說：「吓！點解佢哋會買到咁多飛？我真係唔care，（多開幾場？）開幾多場都係炒，上次開25場都炒，證明我有價值，希望有朝一日連南亞裔的排隊黨都入場聽我的演唱會，咁就勁喇！」對於有傳他於明年在港開騷，Eason親口證實最快可能要2019或2020年，還要成功申請到紅館檔期才可行。
敢攞黎明搞氣氛
談到那英發聲明宣佈不再擔任《中國新歌聲》導師，Eason說：「佢冇同我講，佢做咗六年都攰，唞吓啫，我就做咗一年，（再搵你會唔會做？）諗吓啦。」對於有指那英因比賽有黑幕才辭任，Eason一時口快快說：「TVB都大把，咁叫我哋撳掣算唔算黑幕？撳唔撳最終都係自己主導，我哋唔撳都奈我哋唔何，（網民指那英做導師欠公平？）網民噏乜都得㗎啦！」
此外，Eason早前在ViuTV節目上打呵欠模仿黎明（Leon）唱歌，事後遭Leon粉絲指他欠尊重，對此Eason澄清並沒有詆毀Leon：「我只係模仿佢唱歌，實不相瞞近一年我有接觸Leon，有啲私交至夠膽搵佢搞氣氛，唔熟啲人我唔敢，我入行廿年都知道少啲『踩屎』！」