上個禮拜六，澳門舉行格蘭披治賽車，唔少香港馬圈中人都過咗去睇熱鬧，莫雷拉呢位好鍾意運動嘅騎師，大家都以為佢必定會抽空過去澳門一轉，點知大家都估錯，有熟悉雷神嘅老友表示，雷神好緊張香港賽事，賽前一日又點會亂咁去，專心度吓對手仲好過，正所謂知己知彼百戰百勝。好似呢次夜賽咁，莫雷拉一早幫文廄隻「開心歡星」（圖前駒）做好工夫，今次再跑谷草千二米，大家準備銀紙捧場。其實，呢隻馬上季初上陣時，幕後經已喊殺連天，可惜交俾雷神出戰田草千二米大熱門僅得第三名，自此雷神就冇再沾手，乜嘢原因，相信最清楚應該係雷神，直至今季再出，馬房同隻馬報跑谷草千二米，雷神先至再接番手，原因當然係鞍上人摸通呢隻馬實力喺三班唔會好超，繼續攻田戰要出頭有難度，所以索性等機會，今季馬房面對現實，首戰即替呢隻馬出戰谷草千二米，賽前做好晒工夫，結果只跑位置而回，但呢次輸俾嘅對手，分別係「愛樂寶」及「好益善」，後者再出可以補中，咁即係講「開心歡星」現時能力跑三班谷草千二米是有條件打開勝門。當然，若保持上場入位水準，呢隻「開心歡星」亦未必有十足信心可以補中，所以近期馬房打磨呢隻馬亦空前積極。上個禮拜五，馬房安排「開心歡星」彈泥地閘，由雷神親自主持，結果一放到底勝出，贏第二名「翩翩」，大家都知道「翩翩」係隻頂班馬，試大閘能夠贏到「翩翩」，經已算佢本事。由於馬房備戰認真，加上莫雷拉上次騎完入位後，依然肯應承呢次再騎，證明呢隻馬現階段是有本錢贏馬。文家良上次夜賽憑「有獎」贏馬捧盃，打破個多月冇頭馬進帳嘅悶局，相信突破呢個關口後，有作戰狀態嘅馬匹會陸續交出水準，呢隻「開心歡星」應該可以為馬房添頭馬成績，大家不妨一捧。