大家睇吓第二場第五班跑二千二百米大長途賽，有四隻出自李易達馬房，而且呢四隻都係實力分子，分別係「火天大有」、「幸運神駒」、「心有靈犀」及「乘勝追擊」。「心有靈犀」跟「乘勝追擊」上場喺同一路程串Q，今次再加多兩隻廄侶，有「幸運神駒」及新降班嘅「火天大有」，相信其他馬要贏呢場長途賽，一定要過李易達呢四隻馬至得。有心水清欄邊客指出，上次「心有靈犀」能贏，主要功勞都係羅理雅，事關嗰場冇馬肯做步速，早段馬匹塞埋一舊，「心有靈犀」屬要爆一段嘅馬，假如步速越慢，呢隻馬贏面就越細，所以未入彎時，羅理雅當機立斷，即催策「乘勝追擊」加速，希望製造番一啲正常步速出嚟，反正本身亦係一匹機會馬，後上馬如果追唔切，佢就有機會得米。結果喺入彎前發力，大大話話衝咗四百米過外，馬群終於俾佢扯散，而攝喺內欄嘅「心有靈犀」，因為「乘勝追擊」幫手做步速，入直路未幾，好輕易搵到中外檔空位衝刺，結果連「乘勝追擊」都殺低埋，所以嗰場最大功勞要講係羅理雅，如果佢唔用呢一招，可能兩隻馬都會輸俾跑第三名隻「糖黐豆」，或用均速跑得第四名嘅「頌義」。呢次「乘勝追擊」為咗大局失去場頭馬，今次再來，點樣跑法真係唔知，尤其馬房加多兩隻實力馬喺其中，假如李易達將控制步速責任交由呢兩隻新加入嘅馬，「乘勝追擊」跑番自己嘅話，相信呢場頭馬應該實食冇黐牙。