■民主黨喺fb出文出圖話自己黨友被判刑，都唔知係攞景定贈慶。 民主黨fb圖片「佔旺」期間違反清場令而被控藐視法庭嘅犯事者，陸續要面對自己種下的惡果。民主黨前日就喺「佔旺」案其中4名被告有裁決結果後，就喺facebook出文抽水，仲將自己黨友、其中一名被告張啟昕張相放到最大，都唔知攞景定贈慶嘞。雖然法官今次判張啟昕緩刑時指出，輕判原因之一係因為佢一早認罪同有悔意，但民主黨唔知係咪只志在出post，根本冇去睇判詞內容，仲巴巴閉閉咁話「公民抗命，無畏無懼」。有網民就留言鬧爆︰「『泛民』政棍最叻就係推你班年青（輕）人去送死，佢哋就係（喺）後面同金主食花生。」
民主黨有成員因為「佔旺」被判刑，就嗱嗱聲喺fb出文，懶巴閉話「公民抗命，無畏無懼」，仲話下個月仲有16人要判刑，「我哋一個都唔應該忘記」，但整出嚟張相就係前日被判刑嘅4個人，自己黨員就當然張相最大𠻹啦，真係「一個」都冇忘記㗎。
不過，睇返有關案件內容呢，張啟昕嘅求情理由係「分唔清挑戰警察同施行公義嘅分別」，明顯就係俾人誤導啦，??家唔搞政治、專注民生，再加上一早認罪同有悔意，法官先決定判佢監禁一個月，緩刑一年，另加一萬蚊罰款。
對於民主黨唔理三七廿一咁抽水，唔少網民都留言鬧爆。「Thomas Lam」就質疑︰「民主黨班幕後大佬點解冇事嘅！」「Biu Cheung」亦鬧爆︰「政棍教壞細路！」「Neo Neo Lai」就鬧支持抗爭嘅人話︰「花生友！掉（調）轉你去坐監吖！我送光環俾（畀）你又點話！」「Tang Wa Lam」則揶揄︰「無畏無懼，剩係怕坐監。」
留言唔啱聽 轉頭被消失
民主黨肯俾呢班網民鬧幾句都算係咁，有啲網民留言唔知點解過咗晚就「被消失」。好似「毛仁川」嘅留言「加入民主黨害你一生，爭取什麼？做特首或議員又無資格，袛（只）能做販夫走卒，替人打江山！」就唔見咗；「Stanley Cheung」嘅留言︰「本來一班大好青年，誤入民屎（主）黨既（嘅）歧途，終於自毀前程，抱撼（憾）終生，民屎（主）黨真害人不淺。」一樣唔見埋。■香港文匯報記者 甘瑜