反對派喺立法會九龍西補選失利，被視為落敗者姚松炎嘅幕後軍師、立法會議員朱凱廸就一直潛水，到噚日終於出嚟話︰「『民主派』失利，成個『民主派』、包括我本人，都一定要負責任，並向我哋支持者道歉，我認為呢個無疑問。」有網民就話，錯就成個民主派錯，「阿Dick生（朱凱廸）嘅道歉絕對可以成為卸膊教材，學嘢啦。」
朱凱廸一邊話向支持者道歉冇問題，但就冇真係致歉，另一邊就話要還姚松炎「公道」，因為根據投票數據呢，姚松炎嘅得票比例唔差喎，認為係「民主派」冇將「反DQ」扣落選舉，所以先令市民感受唔到問題咁話。
當然唔少得嘅，就仲有「民主派」冇樁腳啦。
朱道歉係「卸膊教材」
咁樣道歉，網民又大開眼界啦。facebook專頁「香港，去死吧。」就話呢個真係「卸膊教材」，因為內容表達咗朱凱廸只要負N分之一嘅責任，佢係代表其他「民主派」嘅意見，唔係佢嘅意見，係成個「民主派」無能啫。
你唔肯認錯，總有人幫你點返晒啲錯處出嚟。「葉士」就講到明咁話︰「輸左（咗）就係輸左（咗），點解唔講真心說話仲要張大眼睛講大話？『泛民』協調選舉係事實，朱姚反對Plan B係事實，朱姚出爾反爾係事實......『泛民主派』票源流失係事實，朱姚有違民主精神係事實，希望你倆位下次不要再出來幫倒忙！」
「Eric Chan」就批評朱凱廸班人︰「完全唔識玩政治，完全唔夠班，做番（返）閣下所擅長嘅土地政策研究好過。」
「Raymond Hui」質問︰「講句道歉就算丫（吖）？引咎辭職，永不參選！」
朱粉鬧晒全香港人
不過，朱凱廸仲可以咁高姿態係有佢原因嘅，有朱粉就開始幫佢兜。有別於朱凱廸鬧晒「民主派」，「Vanessa Lo」直頭鬧埋全香港人︰「永遠都可以做得更好，係咁艱難嘅時候仲肯企出黎（嚟），已經好難得。成日話自己香港自己救，比起連投票都唔想嘅人，你地（哋）做多好多千倍。」
「Lee Kwok Hung」鬧埋投畀鄭泳舜嘅啟德居民︰「朱凱廸有乜責要負，班選民低B成咁，咪等佢地（哋）繼續食蛇齋餅糉囉，上次鉛水事件，邊啲人幫你，邊啲人HEA你睇唔到咩，選民賤（建）聯果（嗰）班選民抵佢飲鉛水架（㗎）！」
「Rebecca Tin」仲犀利，定義咗反對派今次係贏咁話︰「最憎最討厭落井下石、見人講人話、見鬼講鬼人（話）......姚議員雖然輸左（咗）社區選票，但又一次嬴（贏）左（咗）大部份（分）香港人心，雖然傷感，我們輸了善良、單純，對方贏得更多陰招。無陰招，講實力，我們羸（贏）9條街，空降不是太大問題，因為票數相差不大。」
「Sam Wong」就忍唔住留言反駁佢︰「打飛機係生唔到仔架（㗎）！」 ■香港文匯報者記者 甘瑜