只識網上打嘴砲、講就兇狠做就毓民嘅「鍵盤戰士」，其實仲未算係最令人討厭嘅物種，最令人討厭嘅係打嘴砲但同時唔抵得人做到嘢，仲要用盡方法污衊其他人者。「香港眾志」為咗喺明年區議會選舉爭位，同埋培育參加立法會選舉嘅地區勢力，搞咗個叫「南區萬事屋」嘅組織，開頭都好似好勤力，做唔做到嘢就未知，起碼都成日搵人落區打卡，但就真係路遙知馬力，該組織近期似乎冇咩聲氣。不過，所謂死唔斷氣，佢哋得閒唔做好地區工作，反而發帖抹黑該區區議員，話人哋冇做嘢喎！但睇睇fb，數大家做過咩嘢，就即刻高下立見。
「自決派」有幾咁堅離地，睇吓今年立法會九龍西補選時嘅蟲炎（姚松炎）咩表現就知。就係因為堅離地，佢唯一可以做嘅就係抹黑對手，竟然話一個喺深水埗做地區服務超過10年嘅人係「富二代」喎！最後都奸有奸輸。不過，由此可以睇到離地都唔夠惡劣，造謠先至令人齒冷。同係「自決派」嘅「眾志」，亦都淨係識玩呢種套路。
參選時派單玩狗都打卡
話說「眾志」頭頭河童（黃之鋒），同副主席袁嘉蔚為咗爭區議會議席同培育地區勢力，成立咗個所謂「南區萬事屋」嘅組織。最初兩人經常落田灣，派傳單又打卡，玩狗仔又打卡，然後吓吓針對田灣區議員陳富明，話人做唔到嘢。但其實，要講地區事務，吼住立法會議席嘅河童，又點會真心做嘢吖，所以成日美其名以所謂「社區參與」，叫街坊自己提出問題、自己解決喎。
不過，河童其後因衝擊政府東翼前地刑期覆核被判監，5年內不得參選。知道冇得選，佢就開始絕跡田灣，雖然之後刑期推翻咗，但之後到「眾志」常委周庭因為鼓吹「自決」而被DQ，冇得參加今年嘅立法會港島區補選，同周庭同黨嘅河童同袁嘉蔚就即時謝晒，幾乎冇再落過田灣咁滯，但就繼續keep住「萬事屋」呢個組織。
一味轉載人哋嘢扮做咗
近日，「萬事屋」突然又撩交打，發咗張叫「佛系區議員」嘅帖，話有人「掛banner當做咗，同亂claim功績就會自動當選」咁話。佢班支持者就畫公仔畫出腸，話個帖就係話緊陳富明咁講。
講人講得咁過癮，又睇吓「萬事屋」自己近期做咗咩？對唔住，睇勻佢哋fb近期發嘅帖，真係涉及「做實事」嘅就係有好幾個反對海怡起酒店嘅帖，但內容都係鬧幾句，連落街收集簽名都費事，只係叫市民「自己」做佢哋個網上民調。其他帖呢，就係不斷轉發其他專頁，例如「南區交通」、「南圖」、「鴨脷洲變形記」嘅帖，近期惟一一張見人嘅帖，就係復活節幫人影相。
咁睇吓「掛banner當做咗，亂claim功績」嘅陳富明嘅fb？佢詳細交代咗自己近期喺區內做咗啲乜，包括敦促路政署移除了在香港仔海傍道旁指示不清晰的工程用臨時路牌，仲有更換連接漁歌街及田灣海傍道行人天橋已損毀嘅照明裝置，維修田灣興和街損毀多時的行人路等消息。
當區區員有成績上晒網
睇返河童同袁嘉蔚想參選時，就日日落田灣打卡，連同街坊隻狗玩都要上載張相喺fb，到現在除咗立法會港島區補選期間猛為區諾軒拉票外，啲帖唔單止人樣都唔見多個，就連地區事務都基本無影，話人「亂claim功績」？真係一隻手指指住人，四隻手指指返自己，幅「佛系」圖，似乎啱�哋自己多啲囉！
■香港文匯報記者 陳川