■陳秀慧發現河童分享司徒子朗鬧《蘋果》嘅帖子。陳秀慧fb截圖有毛有翼當然曉自己飛啦，更何況氣焰囂張嘅「香港眾志」？但飛還飛，唔好掉頭咬自己「恩人」好噃！近日，《蘋果》唔知做咩搵娛樂版走去跟「青症雙邪」之一嘅Cheap禎（游蕙禎），仲圖文並茂報道佢同「微胖男」拍拖嘅報道。在「佔中」後「聲名大噪」、同當初捧起佢嘅壹傳媒集團創辦人肥佬黎（黎智英）唔妥嘅河童（黃之鋒），就點讚仲轉發咗自己友爆粗鬧呢篇報道嘅帖子，真係一啲都唔畀面。
話說《蘋果》圖文並茂咁報道咗Cheap禎同疑似男朋友去大坑一間茶餐廳醫肚，然後喺大坑道一條後巷嘅盡頭「傾密偈」，仲話Cheap禎挨埋男仔身邊，成個頭枕埋去對方膊頭，對方就輕吻佢額頭，輕輕攬吓腰，之後又去到一間cafe再坐一會，最後沿浣紗街離開時，男方再攬住Cheap禎條腰仲咬耳仔成分鐘。
爆粗鬧賤格兼垃圾
睇完篇報道，學阿Sa話齋，「我想嘔呀！」Cheap禎嘅自己友就覺得《蘋果》好無良囉，曾任羅三七（羅冠聰）議員助理、一時「港獨」一時「自決」嘅前學聯常委司徒子朗就發帖，爆粗鬧《蘋果》賤格兼垃圾。
成班「港獨」分子，包括曾經「受害」、俾《蘋果》影佢同女朋友「溫馨」嘅港大學生會前會長馮敬恩，中大學生會前會長周竪峰、王澄烽，Cheap禎前助理李宗澤，同「消失了的青症Plan B」袁健恩等紛紛表態支持。
同一時間，「眾志」成班友，包括秘書長河童，副主席袁嘉蔚，前學聯副秘書長岑敖暉，繼承「學民思潮」但近期幾近無影無蹤嘅「教育實驗學社」成員黃子悅，學聯及學生活動基金有限公司董事陳珏軒等等都有讚噃。
陳秀慧見些牙好驚訝
「熱狗」嘅殘獸胃（陳秀慧）仲發現咗河童私吓分享咗呢個帖，仲揶揄佢「哇∼ 之鋒哥share人地（哋）啲嘢××蘋果日報呀∼ 震驚呀∼」。不過，獸姑妳反應過度啦，因為河童「紅」咗之後，一早已經當肥佬黎「只係一個幫過我嘅契弟」，包括公開寸過肥佬黎：「點解我17歲，你50歲，然後我就要特別聽你講呢？」
另一個「幫過佢嘅契弟」、網台D100老細鄭經翰，特登幫「眾志」開個節目，結果又係點？羅三七同河童此前因衝擊政府東翼前地案上訴獲准保釋，翌日就只係接受港台同商台嘅訪問。鄭經翰鬧咗幾句，就俾羅三七喺fb公開話佢係「自負老人」喎，所謂「用完即棄」，你班老人家真係識條鐵咩。
■香港文匯報記者 陳川