■成班傳統反對派去聽審，話「目標一致」。咩「目標」先，「港獨」呀？fb截圖法院正審理涉嫌策動旺角暴亂的「本土民主前線」前發言人獨琦（梁天琦）等被告的案件，此前一直聲稱不支持暴力、不支持「港獨」的傳統反對派中人，包括曾經鬧過獨琦「食人血饅頭」嘅「長毛」梁國雄，同獨琦割咗席嘅工黨前立法會議員何秀蘭等，齊齊去法院「聽審」打卡。有「獨」派中人狠批佢哋係因為仲有兩個立法會議席要補選，明年更係區議會選舉，所以出嚟打卡呃光環，試圖爭取「港獨」嘅選票，先係真真正正「食人血饅頭」嘅無恥政棍。
話說喺2016年立法會補選時，長毛為咗幫公民黨嘅戇橋（楊岳橋）拉票，就批評其對手獨琦借旺角暴亂一事爭選票，係「食人血饅頭」。近日，獨琦旺暴一案開審，長毛就話自己日日都去聽審。
長毛個副手黃浩銘，同何秀蘭，及已退出公民黨嘅曾健超、學聯前副秘書長岑敖暉、民主黨嘅游月華等都唔執輸，聽審之餘更喺法院門外打卡，何秀蘭喺fb發咗相，仲發文話：「因為梁天琦，前公民黨、民主黨、社民連、眾志、工黨成員有緣碰頭。雖然在光譜不同位置，何須分歧，當可以為同一目標站在一起。」
打卡秀黨旗 博票呃光環
成班傳統反對派走去打卡，身為經營fb專頁「影攝食」、疑為旺暴被告之一的盧建民就在fb發帖，狠批道：「抽少陣水、打少陣咭（卡），會死嗎？這樣，只會為各被告增添壓力！」
講過「食人血饅頭」嘅長毛，就受到最多的批評。
「無敵神駒」仇思達個益友「JoJo Wu」就特登回帶返長毛2016年講過嘅說話：「如果用革命做幌子叫人投佢一票的人，係食緊人血饅頭......用革命來、用六十多人被捕去做的選舉運動，係人血饅頭。」
「元小武」就狠批：「條×樣又食天琦饅頭，一間法院門口影相打卡！」「Wen Li Yang」也道：「對香港政黨歷史認識淺的年青（輕）人，可能會被社氓（民）連騙倒（到），只要認識深了而良知未憫的，都會鄙視以這長毛為首、肥佬黎為後台的政黨！扮嘢，呃得到人幾耐？」
「Mark Lau」更喺fb上載咗張喺高等法院廁所內影嘅相，相中顯示一束捲起的社民連旗幟。佢話喺4月19日上晝自己親身影嘅，當時係梁天琦第四日喺法院作供，「你做乜×野（嘢）準備定你地（哋）既（嘅）旗幟？×你老母你究竟係黎（嚟）關心聽審，定係想有機會有鏡頭下Show你地（哋）團體既（嘅）標致（誌）？」
何秀蘭扮熟 被寸「搞遊行吖笨」
何秀蘭話「因為梁天琦」，不同黨派「可以為同一目標站在一起」個post，亦引來唔少負皮。沙田區議員陳國強個助理邱文勁，就喺妐g營嘅fb專頁「椰子是無辜」的專頁發帖揶揄：「一齊支持佢坐呀嘛，我知架（㗎）。」「Chris Li」就問：「其實佢地（哋）同一目標係乜？」「Brian Yeung」一矢中的：「唯一目標係曝光囉！選舉期臨近鳥！」
有傳統反對派的支持者對此也看不過眼。「John Lo」揶揄道：「何秀蘭咁都講得出，心（深）感佩服。」「David Chan Chi-Man」更狠批：「人地（哋）『本民前』自己都無人出來撐，你何秀蘭和游月華竟然企出來支持，為何不索性搞個『支持梁天琦大遊行』呢？為何不搞呀？」■香港文匯報記者 陳川
網民鬧爆政棍「饅頭雄」
Maxi Mo：佢（長毛）宜（𠵱）家係，利用佢所謂嘅別人食人血饅頭去做佢自己嘅選舉運動。單案天天上報，當然機不可失。
Simon Fong：一句講晒、你食就天公地道，人食就天地不容！
Milk Tea：長毛就係比誰都著（着）緊議席，所以先要Keep 住光環。一定唔可以比（俾）D（啲）後生取代佢呢D（啲）自以為激進的光環。
Sammie Chung：到補選時，佢又話自己支持「本土」理念，又乜又×......
Mui Ying Ling Allard：饅頭雄一向都是政治行為藝術者，即是政棍，祗（只）為了個人的利益而爭取的政棍，不是為了甚（什）麼民主自由的理想而戰！
Mary Kwan：政壇耆英雞仔蘭不是已經割了蓆嗎？
Brian Yeung：唯一目標係曝光囉！選舉期臨近鳥！
Sheng Chau：去法庭打卡聽審？×街死喇去！咪係為×咗個補選，希望籍（藉）着梁天琦嘅光環，補選可以攞到更多「本土派」嘅票！哩（呢）班友越睇就越想嘔！「泛民」不死，香港不生係真嘅！
資料來源：fb留言
整理：香港文匯報記者 陳川