■顏汶羽支持植潔鈴。 顏汶羽fb圖片青年民建聯副秘書長植潔鈴參加東區區議會佳曉區補選，作為青民主席嘅顏汶羽，噚日都喺facebook出文力撐戰友，大讚植潔鈴做事妥當、對市民上心，一直都見到佢對服務社區嘅堅持、熱誠、着緊，相信市民同佢一樣聽得到、睇得見。
顏汶羽話，呢幾年喺青民嘅日子，植潔鈴係佢嘅左右手，分管港島區嘅地區青年工作，「每次由佢策劃既（嘅）活動，我都千萬個放心，我知道佢一定會搞得妥妥當當。」
唔止青民嘢做得出色，地區服務都係咁好。顏汶羽話，每次去到小西灣，都見到每個街坊都同植潔鈴關係融洽，「好似一家人咁」，「佢一直喺小西灣代表民建聯服務，從無間斷，堅持每件事都做到最好。佢對每個求助個案都好上心，有時好夜好夜都仲見緊事主。」
相信市民聽得到睇得見
顏汶羽仲話，睇到植潔鈴對服務社區嘅堅持、熱誠、着緊，大讚佢係一個青年從政嘅代表，「我更相信市民同我一樣係聽得到、睇得見既（嘅）。希望，一直都在！」
佳曉區參選人還有陳真真、李鳳琼。 ■香港文匯報記者 甘瑜