■「眾志」嘅羅冠聰發帖抽梁耀忠水。 羅冠聰fb截圖反對派政圈中嘅恩怨情仇，有時真係千絲萬縷又錯綜複雜。話說街工白頭佬（梁耀忠）喺前日勞動節俾轄下3個職員踢爆佢係「無良僱主」，白頭佬就呻晒窮話街工財困。曾經喺2016年立法會選舉提名畀白頭佬選超區嘅黃大仙區議員譚香文，就喺自己facebook出文，話睇過「街工」盤數，「唔似白頭佬講到咁財困喎」，仲封埋佢後路話如果真係要炒嗰3個職員，就要按法例要求找清遣散費，「希望你街工好人做到底，唔會拎強積金對沖咁衰仔。」
白頭佬喺街工嘅勞動節集會俾轄下「勞工組」3個職員大踢爆，話白頭佬通知佢哋下個月就無糧出，但唔等於解僱，「可以」做義工喎。咁「皇恩浩蕩」嘅講法當然俾人大鬧「無良僱主」，白頭佬就話佢哋近月突然財困，支出好大，實在無辦法喎，但至於點解會咁呢，佢就唔肯講嘞。
你唔講，人哋咪唯有睇現有資料囉。譚香文就話自己分析過街工盤數，並唔係咁財困喎，仲回應傳媒話佢整體依然賺錢，再指出埋街工教育中心，2014/15至2015/16年間收入多咗230萬元有多，累積資金達335萬元，係好賺錢𠻹。
「你唔係對沖遣散費咁衰仔吓？」
回應完傳媒，譚香文再喺自己fb出文，質疑街工其實想「排除異己」，話街工「屬下兩個機構年年有錢賺，2012至2016年間每年盈利及累積盈餘基本上穩步上揚。如果『臭罌忠』（梁耀忠）咁都叫財困，俾佢望到我辦事處盤賬咪要告急話破產？」
譚香文仲封埋白頭佬後路問︰「果（嗰）3位幹事家陣究竟係正式解僱定打算唔俾（畀）人工先？解僱的話請按法例要求找清遣散費﹙希望你街工好人做到底，唔會拎強積金對沖咁衰仔﹚、代通知金或長期服務金先好。就算你唔俾（畀）人工要人改做義工都好，呢D（啲）都係你要做的事。」
曾經都諗過出選超區嘅譚香文又挖返舊時嚟講，話好後悔2016年嘅時候提名白頭佬喎，仲話不如畀公民黨陳琬琛好過。佢再進一步數臭對方，「佢做代理主席的表現固然係令人失望，係（喺）議會內碌碌無為。作為勞工團體家陣仲要搞出勞資醜聞，咁樣對待自己的員工，連歡迎返嚟做義工都講得出。好心你臭罌忠2020（年）就俾（畀）年青（輕）人上位喇，都Out到出晒臭草就唔好再阻住地球轉喇。」
訟黨「佔中」分子棒打落水狗
戰鬥力鬧吓鬧吓上升到100嘅譚香文，仲將自己呢個帖文周圍轉貼，唔覺唔覺就喺十幾個fb專頁度擺埋出嚟，都咪話唔狠。
唔少網民都跟住鬧爆白頭佬。「David Yeung」話︰「一直冇作為的人就應該退落來。」「Samuel Lee」直言︰「我唔會再支持街工及梁耀忠。講完！」「KC So」猜測︰「可能係佢（白頭佬）財困。」
譚香文鬧人可能就係個體戶意見，但fb專頁「佔領中環」都轉載咗宒g文，進一步踩白頭佬話︰「一個人連立法會主席個位都唔敢坐， 令到所有同路議員畀（俾）人撳住打，重DQ左（咗）咁多個議員！你重點可以要求佢對自己的員工有幾好？其實好想同佢講：白頭忠！ 你廢到同舊（嚿）垃圾冇分別！真係唔死都冇用，自動消失啦！」睇嚟2020年立法會換屆選舉，白頭佬可能連「初選」都冇得玩嘞。 ■香港文匯報記者 甘瑜