■長毛話︰「這個人！好好笑，識少少，扮代表！」 長毛fb圖片冇得做立法會議員之後係過點嘅生活？社民連長毛（梁國雄）喺浸會大學推傀儡莊失敗之後，就去咗同網民嗌交，仲上網公審網民添。話說早兩日長毛喺神駒（仇思達）做節目時，走去同班聽眾益友嗌交，拋書包鬧人時俾人揭出錯，竟然轉個頭返自己facebook貼咗嗰個網友張頭像出嚟，仲話︰「這個人！好好笑，識少少，扮代表！」
網民都搲晒頭咁話︰「喂阿哥，因為我捉到你小小錯處，你就小氣（器）到要公開批鬥我？你係咪未食藥呀？」
神駒呢排追擊緊長毛喺網上都係數一數二嘅熱鬧事，兩人喺網上節目隔空對罵都唔少。點知長毛早兩日走去神駒fb同益友鬧交，其中就攻擊一個叫「Dylan Thomas」嘅網民話︰「不要侮辱愛爾蘭詩人，Thomas Dylan是你去濫用的嗎？」
點知益友就瞬間踢爆佢講錯嘢，話Dylan Thomas係威爾斯人，唔係長毛所講嘅愛爾蘭人囉。
一般人樣衰咗多數當冇事發生，長毛當然唔係一般人，竟然喺自己fb分享網民「Dylan Thomas」嘅頭像，仲話人「識少少，扮代表」添。
「Dylan Thomas」隨即留言反擊︰「喂阿哥，因為我捉到你小小錯處，比（俾）我話Dylan Thomas係威爾斯人而唔係愛爾蘭人，你就小氣（器）到要公開批鬥我？你係咪未食藥呀？我有冇講錯呀？我只係普通市民，唔係四屆立法會議員，我又冇扮野（嘢）同你討論你d（啲）馬克思理論，我只係講我識既（嘅）野（嘢），點『扮代表』呀？我地（哋）以前又比（畀）票又捐錢比（畀）社民連，冇諗過到頭黎（嚟）比（俾）人×番（返）轉頭！請你梁國雄立即停止文革式批鬥香港市民！」
不過，事實上長毛啲支持者都唔係好知佢做乜嘢，多數人都係勸佢唔好勞氣就算，有啲人就直言覺得佢咁做唔係好啱囉。
「Jack Cheung」表示︰「毛哥，我唔贊成你post（貼）人哋profile（頭像）起人朵嚟審佢，因為你係公眾人物、可以呼喚到你支持者；人哋只係普通網民。」
其他網民就挑機留言。「Lee Tsz On Bruce」反問︰「點完相喇，然後呢？」「Mandus Lau」就仿長毛口頭禪狠批︰「一個做過4屆嘅前立法會議員走去批鬥一個普通市民，含× la（啦），含× ar（啊）。」
唔知係咪俾人刺激得多，噚晚神駒做節目時打畀長毛，長毛竟然再癲啲咁鬧人，不停叫神駒「含×」，攻擊神駒「五短身材」，仲話自己聽佢電話係畀面佢，神駒都句句見血咁反駁「除咗『含×』你仲識講啲咩」、「『五短身材』係你隔籬個黃浩銘」、「你唔好咁重階級觀念得唔得？你以前都係工人嚟㗎咋。」
堂堂前立法會議員同網民嘈成咁，真係肉酸咗啲囉。不過算啦，男議員搶女人電話都有，對反對派仲使乜有期望。 ■香港文匯報記者 甘瑜