呼吸呢樣嘢就係人都需要，但係對於「佔中三丑」之一、香港大學法律系副教授戴耀廷嚟講，有一樣嘢同呼吸一樣，都要無時無刻去做，就係亂噏嘞。去完台灣鼓吹「港獨」，返嚟香港就繼續硬銷佢個「風雲計劃」，即係刀仔鋸大樹，博反對派喺出年區議會選舉攞到過半議席嗰個。鬆章畀自己友傳媒做專訪，結果就畀山埃人哋，又話區議會有「地方行政權」，又話有成39個位嘅沙田區議會係「中小型區議會」，搞到人哋編輯戴完一個頭盔戴唔切第二個呀該煨！亦由於呢個「風雲計劃」真係好似《風雲》漫畫咁天馬行空，自己友都睇唔過眼，叫佢擺得平反對派啲大黨再講！ ■香港文匯報記者 陳庭佳
親反對派網媒《立場新聞》前晚出咗戴耀廷講「風雲計劃」篇專訪，佢先將矛頭指向單程證制度，聲稱每日都有150人落嚟，6年後會多30萬新來港人士，令到反對派支持者失去多數優勢，亦都可以預見到中央嘅「收緊」工作會愈來愈大，所以出年區選同後年立法會選舉一定要做啲嘢，最遲都要喺2023年區選同2024年立法會選舉去「選舉抗共」喎。
亂吹反對派要喺區會「執政」
佢希望反對派可以「盡全力搶灘」，攞到一兩個區議會過半數優勢去「執政」，因為「區議會有地方行政權」喎。咪住，現時嘅區議會只係一個畀意見嘅組織咋喎，錢嗰方面最多都係有筆撥款落到嚟先至決定點用，好似社區重點項目同埋小型工程咁，而《立場》個編輯都無恰到眼瞓，加咗個「編按」補充返。
通常啲嘢一錯起上嚟都會好似骨牌咁一直冧落嚟，戴耀廷之後講到反對派主要喺「中小型規模」嘅區議會最有機會搶灘，其中以沙田同深水埗呼聲較高。
嗱，睇返資料，深水埗區議會23個位，話佢係「中小型」都講得過去，但係沙田區議會有成39個位，議席係繼元朗區議會之後最多，單計民選議席更以38個冠絕全港。小？邊度小呀？睇過？
本身係「Law友」嘅戴耀廷，又同大家講吓數學，話反對派、建制派和中間游離選票三分天下，如果投票率有48%，即係每邊有16%，到時佢班「風雲戰士」，就要先穩住反對派嗰16%，再喺嗰16%游離票方面同對家二一分作五，最後就要催谷喺立法會選舉支持反對派、但區選隱咗形嘅11%選民支持佢哋。
但係嗰11%選民憑乜要支持班「戰士」先？身為基督徒嘅妠N話：「嗱！咁你買唔買六合彩吖？好多人都買㗎啦！你諗住你自己會中？......你落一注都係10蚊啫，咁你去投票都係30分鐘。咪不如大家博一博啦。」
「獨派」：你叫大黨讓路先啦！
唔少人都當篇嘢係科幻小說咁，好似靠「反水貨」起朵嘅「獨派」梁金成就話：「首先你叫啲大黨讓路先啦！」
「Phikiptam Tang」就提到反對派喺幾屆立法會選舉中，都係射落海嗰隻高選票、低議席，「你哋×街『泛民』裡的民主黨、公民黨、工黨，鬼打鬼，浪費晒啲選票，你哋自己反省吓先啦。」
「Donald Law」就好灰機：「地區工作除了建制，乜仲有『泛民』咩？」
「Mathew Leung」更加索性叫戴耀廷放過香港人：「仲喺度話立法會係抗爭手法，真心覺得呢啲大話仲可以呃到幾多人？」