很多人都以為「八十八十」跟「七十七十」係同主馬，其實唔係，「八十八十」係李運強夫婦所擁有，也即係「包裝騎士」及「五十五十」等家族馬，至於「七十七十」馬主蘇凱華，乃蘇啟聲嘅公子，佢同李運強係非常老友，季內「五十五十」同「咪走寶」一齊擺慶功，這兩駒都係養喺何良馬房，足見佢哋老友鬼鬼，皆因「咪走寶」屬蘇啟聲所擁有。今次「七十七十」列陣，情況有點似「八十八十」，就係棄跑田戰，決定向谷草發掘出路。馬房安排此駒喺四月十四日彈一課谷草千二米閘，由潘頓親自考驗，結果走位係4 4 1，轉入直路未幾見鞍上人輕輕一鬆韁繩，馬兒即自動波追上，以半個身位壓住「皇帝詔令」過終點，潘頓試過呢課大閘後，埋門再見呢位仁兄替隻馬拍過兩課，一課跟伴跳馬拍，另一課屬私下彈細閘，以廄侶「龍鳳情祥」作伴，兩課拍跳走來均勝廄侶。今次雖然初跑谷戰，但從該課谷草大閘所見，顯然非常適應，本身有速度，且有多少追勁，最啱跑馬地場地，蘇啟聲公子呢隻「七十七十」擺明車馬要窄場爭功，何況賀賢宜家水深火熱，實力馬匹必定鍊到盡，相信唔會令大家失望。話時話，賀賢目前得九場頭馬，仲有七場至達標，不過計獎金經已達標，但頭馬始終距離合格數太遠，所以未來日子盡量多贏頭馬至有合格機會，預計佢贏多五場至十四場，馬會都唔會發警告信俾佢，未來呢兩個幾月，賀廄一定為爭取達標而全力以赴。