睇見李國能呢位前任大法官今季頻頻喺凱旋門拉頭馬，皆因佢隻「架勢」真係一如其名，季內已贏咗三場頭馬，成為泥地怪傑。睇見李國能威威，自然諗番起以前同佢有得揮嘅「唐唐」唐英年。呢兩位馬圈人物情況都係差唔多，因為做官關係冇當馬主一段時間，近年先至又玩番馬仔，唐唐一直都係玩馬發燒友，佢太太亦都係馬主，宜家仲有隻「南京之友」，唐唐當番馬主後，早前養咗隻「奇異晨曦」（圖青色帽），今季仲有隻「心興德仁」仲未出賽，佢見到李國能咁威，點都想自己隻馬可以快啲喺凱旋門上見面。
真係講都冇咁啱，「架勢」大家仲記唔記得第一場係點贏，所講唔係嗰過程，而係環境，佢就係一落五班立刻反彈，返回四班再贏兩場，呢隻「奇異晨曦」上場又落到五班上陣，跑田草千二米被捧成五倍，結果得第十一名，輸六個幾馬位俾冠亞軍「團圓豐收」及「一定勁」。其實，呢隻馬前一場跑四班一千米，經已顯示有多少威力，由田泰安騎獲得第三名，只係輸俾頭馬「龍串鳳」兩個幾馬位，雖然「龍串鳳」再出冇影，但大家再細心睇，跑第四名「怡昌飛駒」再出得亞軍，第五名「軍力勁」再出得第三名，兩隻馬都能提升名次，而「奇異晨曦」上場跑五班賽就連影都冇，似乎令人失望多少。不過，上次隻馬跑得差係有原因，其中一個係步速偏慢，「團圓豐收」拖慢嚟放，要靠正常步速追嘅馬自然吃虧，咁都唔緊要，大家再睇埋賽後報告，「奇異晨曦」自五百米處潘明輝經已指他在「團圓豐收」之後，希望移出較外位置，在「辣辣椒」及「銀城福星」之間取位，可惜未能成功，直至最後二百米遲遲才能望空，所以呢次可以話輸得唔抵，與馬匹實力無關。今次隻馬換上莫雷拉，刻意強配列陣，相信係全力出擊時候。