■「無神論者的巴別塔」揶揄陳淑莊做戲。「無神論者的巴別塔」fb截圖公民黨立法會議員四眼陳（陳淑莊）有做舞台劇就好多人都知，但大家都估唔到佢喺議會嘅表現都咁精彩。「一地兩檢」草案委員會噚日開會，平時潑婦罵街嘅佢，突然改變戲路，一臉委屈咁質疑委員會主席葉劉淑儀「唔講規矩」，講到激動處仲喊埋𠻹，好似非常無助咁。唔少網民都留言揶揄佢「好戲」，話佢之前公民黨黨慶先同葉劉開心合照，噚日就懶係嘢咁攻擊葉劉畀觀眾睇，叫四眼陳不如唔好做議員，返去做演員吧啦。
忽然要官員解釋附表
四眼陳噚日喺議會度突然話，自己做議員都係想「講道理」，仲話自己突然又提出要官員解釋附表，係想成個程序「合法合憲」，話要人順序解返「唔係特登刁難」喎。雖然葉劉中間回覆佢話之前解釋條文時已經解釋咗附表，四眼陳打斷佢繼續講話要「講規矩」，講講吓又突然喊埋，真係震驚唔少網民㗎。
咁喺呢個世界，好多人都好受眼淚攻勢嘅。四眼陳啲支持者就個個留言叫佢加油，話靠佢頂住，但唔少留意開政治新聞嘅網民都予以冷笑。
facebook專頁「無神論者的巴別塔」直言︰「真係愈來愈憎呢個表裡不一嘅『鴉（丫）嗚（烏）婆』，早幾日先笑口西（噬）西（噬）扮Q咁同葉劉合照；今日就淪為街市阿婆，又嘈又盛同另一位師奶葉劉鬥嘴，×，白痴都知你兩個扯緊貓尾做緊戲啦！」
「巴別塔」仲對四眼陳話自己為咗會議發惡夢嘅柔弱言論免疫，直言「無人有興趣知你尋（噚）晚發惡夢呀」，揶揄佢如果只係識得坐喺個位度「×叫」，不如「慳啲啦」。
公民黨創黨成員林雨陽噚日都喺fb貼咗四眼陳喺黨慶時同葉劉一齊影張合照出嚟，再話︰「據說，今天有黨譚姓議員被逐，陳姓議員一度落淚……然後記起上星期見到與葉劉『同行』。」再加上「覺得搞笑（hilarious）」。
網民： 政治綜援演員
唔少網民都揶揄四眼陳「好戲」。「Sandy Soon」話︰「佢都係退出政壇專心做演員啦！」「Howard Au」亦認同︰「舞台劇先係佢世界。」「Chris Tang」質疑︰「係議員，定係演員？」「Mary Kwan」最狠，直情話四眼陳係「 政治綜援演員」。■香港文匯報記者 甘瑜