■一眾政商界嘉賓同劉業強仲有一班鄉紳合影。 香港文匯報記者朱朗文 攝一年一度嘅鄉議局盃，安排咗噚日喺沙田日馬第六場舉行，鄉議局亦都喺馬場包咗廂房搞午宴，唔少鄉紳同政商界名人出席，包括立法會主席梁君彥、民政事務局常任秘書長謝凌潔貞同埋民政事務總署署長謝小華，仲有多個港區全國人大代表、立法會議員同地區官員，當然唔少得要慰勞一班記者啦！
鄉議局主席劉業強出咗名係愛馬之人，問佢名下有幾多隻愛駒，佢可能多到要花時間諗諗，一時間答唔到。佢仲話自己廿零歲嗰陣試過用10蚊買咗條6串1，最後6關過晒袋咗成千萬，認真有天分！不過，佢噚日畀啲貼士就真係麻麻哋，好似鄉議局盃第六場佢就推介2號「錶之霸」，最後就跑得個第八，3號「快利」就勝出呢場賽事。
劉業強：周六講地 月底睇灣區
講返鄉議局未來動向，劉主席話今個星期六邀請到土地供應專責小組主席黃遠輝嚟同鄉紳討論一下土地問題，月底就會去大灣區考察，暫定去廣州、惠州同深圳三個城市，順便會搞埋集思會，傾下點樣保護合法傳統權益、土地同未來參政議政嘅方向。 ■香港文匯報記者 朱朗文