今晚谷草跑八場草地賽，以B欄C彎跑道作賽，頭場晚上七時十五分開跑，全晚唯一盃賽為三班馬角逐一千米爭聖佐治挑戰盃。練馬師方面，何良、霍利時及苗禮德俱派出多匹實力馬參戰，值得優先留意。騎師方面，雷神及潘頓當要吼實，另外十磅仔黃俊由今期起可列陣窄場，且看首戰有否頭馬交出。
第一場、第五班､一六五○米。「星光大師」六歲仔季內不停上陣，表現不似預期，更有點急劇退化感，當然跑至前仗谷草四班一哩再次上名，可見評分已減至有利水位；上仗再跑快放落敗減至四十分；今次已可落到五班打滾兼再報一哩誓師，再看今組對手實力參差不齊，只要馬兒交回近賽水準，當可再開勝門。
第二場、第四班、一二○○米。「銀亮之星」何廄質新馬陣上已學懂留力，但係基於馬兒韁口仍未穩定，跑來始終未見表現，惟最近兩戰交予潘明輝出爭窄場千二，皆在小伙子胯下後追跑入亞季各一；復課打仔馬狀態進一步提升，落腳比前更為純熟，今仗勢必全力爭取開齋。
第三場、第三班、一○○○米。「皇仁先鋒」季內十一月插班初出，跑過八戰表現一次比一次進步，尤其加眼罩後接戰走勢持續接近，三月尾更在田草一千米首次上名；再看最近兩戰田草及谷草一千米皆走勢強勁，質新馬撻着車頭，狀態持續躍升；今次練者打王牌入紙報窄場一千米，排有利二檔強配雷神，在此群對手非強有力開糊。
第四場、第四班、一六五○米。「勁嘉輝」今季年齡再大一歲，戰鬥力難與當年盛時相提並論，尚幸七歲老傢伙一向襟跑襟弗，而且出爭四班賽經常跑入前四名，演出極其準繩，經過三、四月連輸數場田賽借勢回氣兼減分，上仗出爭泥地一哩卻跑入大冷殿軍，估計季尾攻勢即將展開，老馬跑開少操並不打緊，小心今場重現本色。
第五場、第四班、一二○○米。「獵狐者」上季尾進度正式降臨，隨即在窄場千二得一W一Q，終於展現應有競爭能力；踏入今季勇熟更進，尤其季初喺嘉年華試閘按韁輕勝，過程更是可觀，結果季初一出即在雷神胯下取勝，可惜勝後發現流鼻血，之後大半季也未再上陣，是次抖足八個多月再戰勝途，看早前試閘走勢悅目，憑着充沛體力在此力足拚勝。
第六場、第三班、一二○○米。「勇敢傳說」四歲澳洲早熟馬，季內初出角逐谷草千二米即爆出大冷W，在蔡明紹胯下排四檔留後，入彎兜出外疊衝刺仍可贏兩個半馬位；可惜打後接戰皆無功而回，到季中馬主便拉走轉投東廄，跑過三戰只得一季軍，表現也未見大幅進步，然而今次回師窄場千二勝途，環看今賽對手實力爾爾，提防攤凍下才冷門郁手。
第七場、第三班、一八○○米。「勝利仔」（圖5號）今仗角逐谷草千八啱咀形，須知道歷來五場頭馬裏，其中四場於谷草勝出，由此可知，谷草是其出擊主場。而上賽喺三班此程亦後上跑第二名，追勢極之出色；今趟小休再戰，縱負頂磅上陣，因為質素凌駕於對手，不會對爭勝構成阻力，馬房亦要跑數戰意十足，可作膽材。
第八場、第三班、一六五○米。「放眼量」上季只係三零部隊，但踏入今季轉四歲之後，進度理想，陣上演出有明顯好轉，近七次出賽更取得三冠兩亞兩殿，尤其近四仗專攻谷草一哩，當中兩度勝出，前仗陣上發生墮馬意外，賽事步速被中段發力上前的空馬擾亂，本身以跟前跑法僅獲殿軍；上仗發揮正常下跑入配腳；今次乘勇再戰，誠屬三甲正路首選。