■孫慧雪的囝囝9個半月大重25磅。香港文匯報訊（記者 梁靜儀）林盛斌(Bob)與孫慧雪（阿雪）昨日分別帶同三女機兒及兒子Riley到銅鑼灣出席商場活動，活動上二人大談湊仔經，阿Bob又笑問阿雪：「Riley食啲咩？咁大隻， 係唔係啜得多？」首次攜同兒子出席活動的阿雪，笑言感到很緊張，早一晚就要為兒子襯衫。她謂兒子比同齡小朋友要重，九個半月大已重25磅，而活潑精靈的Riley不單識對住鏡頭揮手，又伸手除鞋除襪，十分可愛。
阿雪表示兒子雖然首次出席活動，但就好興奮，早上問他去街好唔好，他好準確就答好。問到湊仔是否很辛苦？阿雪笑說：「佢唔扭計，但抱佢好似舉重咁，我大隻咗好多，身體好壯健，日前又帶個仔參加BB運動會。」她指昨日老公也有送他們到場，但因見到人多怕醜，所以去了食嘢再折返接他們。
享受湊仔的阿雪又稱不覺得大犧牲，至於可怕達唔到修身目標？她笑說：「船到橋頭自然直，拍劇會瘦多啲，八月我會一次過拍兩套劇，希望密集式拍晒，之後放假。」問到兒子識叫媽媽未？阿雪指兒子會叫她做爹爹，因為之前他學叫媽媽時被爸爸笑，所以他只係識叫爸爸、爹爹、爹哋。
林盛斌逼聽廣東歌被大女笑老土
Bob偕同三個女兒表演，他指大女霏霏及二女熹熹是到來支持細女機機，她們會一齊唱Camila Cabello的歌曲《Havana》，Bob不知女兒為何會識聽這首歌。 熹熹即表示是大家姐學校的朋友介紹。阿Bob笑言平時會逼女兒聽鄭欣宜的《女神》及Boy'z的《死性不改》，霏霏即說：「好老土。」 阿Bob就教女兒唔可以這樣講，因會有其他人會鍾意聽。他又透露女兒喜歡聽英文歌， 喜歡外國嘅歌手， 不過父女間不會有代溝，三個女兒每晚更在家中開演唱會，笑言三個女兒可以出來搵食。問他會否重點培訓女兒唱歌？他笑說：「唔會刻意， 係都會訓練咗自己先，自己唱歌仲有待改進 。」他又稱不會逼女兒參加任何課外活動，但女兒有很多興趣，有學打鼓、豎琴、彈琴、劍擊及體操等，所以他要不停工作賺錢供養子女。廿四孝的阿Bob指活動後又會帶女兒去看馬戲團，至於細仔因患濕疹，所以太太留在家中照顧他。