■狗達疑似有參加旺角暴亂。 資料圖片「本土民主前線」前發言人獨琦（梁天琦）日前被裁定暴動罪成，下月判刑，反對派班人就講到佢悲情人物咁，估唔到唔止主流社會狠批，連激進派都不滿，不過係不滿佢「光環」大過自己囉。「熱青城」班人近日就先後就住句「幫我睇住香港」去批評獨琦，「熱狗（熱血公民）」前頭目個老婆殘獸胃（陳秀慧）仲寸爆咁話「幫我睇住地球」𠻹，咁就辣着獨琦嗰邊嘅人，結果俾人挖返佢老公，亦即係狗達（黃洋達）都疑似有份參加旺角暴亂，仲討論緊使唔使舉報佢。今鋪真係：笑什麼，你也是暴徒。
傻根批獨琦出賣「港前途」
「獨琦」暴動罪成，反對派一個二個都爭住笠「光環」落佢頭度，講到佢耶穌再世咁款。自認為可以「皇天擊殺」人嘅「城邦派國師」傻根（陳云根）當然心頭酸溜溜，近日就喺facebook話獨琦真正犯嘅罪，係出賣「香港前途」喎，而所謂嘅「香港前途」，唔係我哋常人諗嗰啲，而係佢嘅「香港建國」路囉。傻根仲話，到時「建國」，會再同獨琦計呢筆賬喎。
講到咁大，一般人都搭唔到嘴，但正所謂物以類聚，殘獸胃就識回應啦，針對住句「幫我睇住香港」，寸爆咁話「幫我睇住地球」。
此話一出，追擊開「熱青城」，擺明係獨琦嗰邊嘅神駒（仇思達）即刻追殺話︰「熱狗青山派真係全部×街×家×嚟！殘獸胃咁×眼紅梁天琦，叫你個廢柴老公去坐下囉，×你×母！」「Milk Tea」留言附和︰「呢班×樣真係無話可說。一時又覺得人哋唔坐監無付出。一時又怕人哋坐監有光環蓋過佢哋。」
神駒呢番話，又提醒咗唔少人唔少嘢喎，「熱青城」嘅回力鏢就此製成。「JoJo Wu」留言話︰「啱啦，黃洋達自稱有『59條罪』，幾時去坐？」有網民仲cap返狗達之前參加旺暴嘅fb帖文出嚟。「Ying Ho Wong」就話︰「『黃洋達：讓磚頭飛』點解唔告煽惑暴動？」
「黃絲」嘅fb專頁「本土武勇激鬥錄」亦cap咗幾幅圖，除咗個「讓磚頭飛」之外，仲有佢引述自己俾記者訪問，問佢點解要叫人掟嘢咁話，當然唔少得佢影低自己當晚嘅相，話俾警察打爆眼鏡個post（帖文）啦。「激鬥錄」再加多把口話︰「敢做不認是抗爭，推人去死扮冇份。」
殘獸胃死撐冇眼紅
突然群情咁洶湧，殘獸胃係咁依cap返神駒句嘢，問返：「我幾時眼紅梁天琦？」咁就當回應咗。佢仲質疑獨琦冇講過「幫我睇住香港」，覺得係班人打飛機啫。有人就搵到其實係第三被告盧建民講嘅，不過你哋咁認真做咩啫，人哋都係想唔理三七廿一英雄化咗獨琦先咋嘛，不如講返狗達筆數先啦。■香港文匯報記者 甘瑜