香港文匯報訊 電影《某日某月》將於本月31日隆重獻映，今次是導演劉偉恒第二部電影作品，延續前作的純愛情懷風格，帶觀眾回到1992年，講述兩個中學生子月（湯怡 飾）和旭日（原島大地 飾）的「異地戀」故事。想當年每個中學生都追捧四大天王、抽YES卡、call機、打電話去電台點歌，悲歡離合，喜怒哀樂，都濃縮在那些年。導演劉偉恒表示，片名《某日某月》就是指兩位主角「子月」和「旭日」：「呢對小情人分隔兩地，上世紀90年代邊有𠵱家WhatsApp、FaceTime、Skype咁方便，好多時都只係靠書信往來；兩位主角相愛而不相見，就好似太陽同月亮咁，永遠唔會碰面。」
屬於80後的女主角湯怡，跟她的角色一樣成長於90年代，所以電影中好多事物都覺得特別親切：「好似講到自己好老咁，其實1992年我都只係得幾歲啫！不過嗰陣我Daddy、Mummy、家姐都有用call機呀、抽YES卡、問同學互相借cassette帶等等，所以戲入面好多嘢我由細開始就接觸過。一路拍，啲回憶一路返晒嚟。」
關於新片名《某日某月》，湯怡認為「某」這一個字亦意味深長：「我覺得每一個喺90年代成長嘅觀眾，睇呢部戲時會好有共鳴，好可能會有『係喎，我哋細個嗰陣都係咁㗎喎』嘅感覺；所以片名用上兩個『某』字，代表『某某』可以係任何人，可以係你同我，可以係每一個經歷過90年代嘅香港人。」至於1997年出生的男主角原島大地，由於成長背景不同，對戲中出現過的90年代事物，都感到很好奇，難怪拍攝期間，湯怡都會充當「老師」，每當原島大地遇上不明白的地方，便從旁細心解說。湯怡表示：「今次我同大地飾演兩小無猜嘅中學生，但現實生活中其實我大佢足足十年！因為好多嘢妘ㄠq未接觸過，好多嘢都覺得好新奇，所以拍攝嗰陣佢都不斷請教導演，又或者問我意見，成個過程都好開心好順利。」