香港賽事雖然以短途賽事主導，不過一眾主要大賽均以長途賽事為主，單單以獎金計，待遇都已經唔同啦，話無大細超就假嘅。不過練馬師引入乜嘢路程賽駒，就好睇佢哋嘅心態，為名定係為利呀？上季蔡約翰雖然以八十七場頭馬當上冠軍，不過佢主要出擊路程就集中喺短途賽事，淨係計一千至千四米就已經有五十七場頭馬，要爭冠軍，短途賽事絕對係佢主要出擊目標。反而，長途賽千八米或以上，蔡約翰只贏得九場咁大把，雖然已經位列次席，不過頭馬數字同首位仍差一大截。以上季成績嚟睇，告仔就成為長途賽嘅大贏家，上季千八米或以上賽事，東廄出馬一二六次，取得十七冠十六亞十四季，比起蔡約翰贏多八場，而呢十七場頭馬當中更包括一級賽香港盃、香港金盃、女皇盃及遮打盃幾項頂級賽事，含金量十足，可以話係威到盡呀！
另一邊廂，郭能剛季成績大跌Watt，全季只贏得廿五場頭馬，對比前一季少了近一半，好大原因係失去咗大倉告東尼支持。郭能上季廿五場頭馬涵蓋十二個馬房，姚本輝六冠成為佢嘅最大支持者。另外，合作取得三冠嘅包括高伯新、文家良及告東尼，郭能分別替告東尼勝出「美麗大師」、「加州議長」及「加州福星」，都是接近季尾時間交出，兩人重新合作再次擦出火花，郭能於新季若再獲得東廄支持，頭馬定必陸續有來。