近季練馬師成績榜的前列位置，在葉楚航首度成為冠軍練馬師之後，可以講一直都係外籍練馬師的天下，羅富全上季開倉首季能夠以六十五場頭馬成為亞軍練馬師，僅次於師父蔡約翰之下，表面上看似順風順水，但其實當中克服的難度甚高，除了實力外，亦有點運氣，事關同期開倉的麥菲文因為季初階段行馬機事件而受到影響，而羅富全則「長驅直進」，以成績證明實力，得到馬主的認同。相比之下，剛季沈集成馬房以五十一場頭馬排在練馬師榜第四名，而呂健威則以四十六場頭馬排第五名，然後到徐雨石以四十場頭馬及較多亞軍次數排第六名，這三位練馬師努力多季，亦難以挑戰冠軍寶座，而葉楚航自從機緣巧合獲得一次冠軍之後，近年已經回到中游位置，可以想像，如果新季有一位華籍練者足以挑戰老蔡的冠軍皇朝，這人必非羅富全莫屬。
事實上，羅富全除了練馬功夫到家之外，亦明白馬房要取得好成績，必定要員工作出配合，賞罰分明士氣一層是相當重要，所以在馬季中段，見到羅富全馬房不時擺慶功宴聯誼一番，令到倉內士氣長期高昂，亦係羅廄能夠取得好成績的關鍵之一。
羅富全能夠在開倉首季已經明白到員工係馬房的重要資產，其實相當難得，有良好的士氣，相信新季要挑戰冠軍寶座，絕非不可能的任務。
