■區鎮樺發帖鬧警察，點知俾大批網民鬧返轉頭。 fb截圖「鴿黨」（民主黨）近年都唔知咩事，接二連三爆出全城譴責嘅嘢出嚟。繼早前有立法會議員許智峯搶女EO（行政主任）手機、許辦職員撕請願者信之後，日前再有大埔區議員區鎮樺俾人抄牌後竟鬧警察「無禮貌」。
圖公審 大大聲話投訴
區鎮樺日前喺facebook度分享咗自己違泊俾警察抄牌嘅事件，聲稱警察叫佢走時佢覺得對方「唔識乜嘢叫禮貌」，所以自己無回佢，點知最終真係俾人抄牌。佢不停喺篇文度鬧警察無禮貌，仲貼埋人哋編號出嚟想公審佢，兼大大聲話「下星期一（今日）就由下而上，逐級逐級打比（畀）佢D（啲）上司投訴。」結果？咪俾一眾網民鬧返轉頭，仲引嚟過千個「嬲嬲」，有啲嘢真係公道自在人心嘅。
可能以為個個都仇警啦，所以違泊被抄牌竟然都仲覺得可以公審警察。區鎮樺前日喺fb出文，就話自己早幾晚將「架車泊咗响碩門邨旁安明街避車處」，自己去入完信箱之後，「比（俾）我預（遇）到個好無禮貌嘅所謂高級警員。」
咁到底有幾冇禮貌呢？原來警察同佢哋講︰「喂~走啦，禁區嚟架（㗎），仲唔走！」其實都好平常，但區鎮樺嘅玻璃心深處就覺得佢冇禮貌，「我地（哋）都無回佢，開咗車尾收手推車。」
然後警察再講多句「喂~走呀！」區鎮樺就大條道理咁話「我地（哋）啱啱做完嘢出嚟喎」。結果個警員就抄咗佢哋牌啦。
區鎮樺嘅玻璃心似乎正式粉碎，話嗰位警察抄牌嘅手法「有問題」，仲問人哋「識唔識乜嘢叫禮貌」，嗰位警察就回咗句「警察做嘢唔使你教」。聽到呢句，區鎮樺嬲到即刻報警「投訴」。
之後一位警長就去到現場了解事件，仲同佢解釋返警察係覺得佢哋冇悔意所以抄牌，區鎮樺喺呢個時候就爆啦︰「佢唔係咁無禮貌，其實我地（哋）都準備開車走，而（𠵱）家『倒返轉』話我地（哋）無悔意，有無搞錯？」
區鎮樺當然非常唔滿意，就喺fb到打咗成件事出嚟，仲公開埋涉事警員嘅編號，話今日開始要「由下而上，逐級逐級打比（畀）佢D（啲）上司投訴」。佢好大官威咁話︰「最鍾意教唔識禮貌嘅警察乜嘢叫做禮貌」，聲言要「唔識就教到佢識為止」，睇吓對方「可以囂張跋扈到幾時！」
網民圍插︰個腦坐喺度
帖文一出就引嚟3,000幾個回應，仲不停增加緊，但絕大多數都係鬧佢。「Jo Wan」直斥︰「自己違法重(仲)出黎（嚟）×！」「Hero Chan」就話︰「自己×左（咗）咪算數囉，點解仲要×到post（發佈）上fb等網民圍你姐（啫）。民主黨真係個腦坐係（喺）度。」
「梁文」撐警察話︰「對知法犯法的垃圾所謂議員不需有禮貌」。
更有網民懷疑佢刪人回應，「Foon Chan」留言話︰「所謂民主黨議員竟然會刪留言！」「Yim Chi Wai」隨即恥笑話︰「等同傻仔峯（許智峯）助理撕爛市民啲信一樣，民主喎！」
睇嚟「鴿黨」今鋪真係要學吓咩叫禮貌嘞！ ■香港文匯報記者 陳永臣