■柴文瀚寸郭家麒個「減膠」建議矯枉過正。 柴文瀚fb截圖雖則有云「保護環境，人人有責」，不過如果提出嘅建議太戇居嘅話，就難免俾人笑喇！事緣公民黨立法會議員郭家麒話要立法禁售細容量樽裝水，以做到源頭減廢，轉過頭就俾同道寸佢矯枉過正，因為如果幾個人些牙（分享）支大水嘅話，用嗰幾個即棄杯隨時可以冚返慳返嗰幾個膠樽條數。郭家麒今次提出呢個「減膠」建議，真係派咗粒大膠出嚟！
禁賣細樽水 嘥多幾個杯
話說郭家麒前排做咗個調查，當中有87%受訪者同意特區政府應該參考西方做法，禁止賣細容量嘅樽裝水，於是佢就建議特區政府考慮立法禁售一公升以下嘅樽裝水，並且推行生產者責任制，減少市民耗用膠樽嘞。
民主黨南區區議員柴文瀚噚日喺facebook些牙有關報道時，就寸郭家麒矯枉過正。
佢話自己除非唔記得咗或帶太多嘢，否則必備個人水壺，不過自己耗水量高，又擔心飲水機衛生問題，認為如果從環保以及便民角度出發，只要收樽裝物品嘅處理附加費，甚至規定膠樽要棄置喺回收箱，公眾自然會減少購買。
網友「Siegfried Lee」加多腳，話日本通街都係自動售賣機，賣容量細嘅樽裝飲品，「幾時將日本列為恐怖分子？」柴文瀚就補充，如果限制只准賣一公升以上嘅樽裝水，「最終結局係多咗一包四至五個紙/膠杯，大家分咗佢算。」 ■香港文匯報記者 陳庭佳