一講起馬后，依家大家只會諗起全球一姐澳洲的「雲絲仙子」，事關呢隻馬現時已經連贏二十七場，可以講得上係打遍澳洲無敵手，跑到現階段的「雲絲仙子」，一日尚留在澳紐當地，就算連贏五十場，既無意思、亦無難度；這不其然就牽涉到遠征的課題。練馬師華禮納與馬主相討後，得出了一致的決定，這匹馬后目前仍會留守當地，全心衛冕年尾的覺士盾，放棄赴英國遠征計劃，這個決定自然是預料之內。
至於在地球的另一面，歐洲去年亦有一匹成績突出嘅馬女，就係鴨都拿王子旗下嘅「成全寶」，呢隻馬以三歲馬身分一口氣贏咗五場一級大賽，包括英皇錦標同埋法國凱旋門大賽，歐洲馬后之名可以講係當之無愧。
不過，「成全寶」今年復出之路可算波折重重，馬匹一再因傷延遲復出日期。相隔十一個月，「成全寶」早前終於再次上陣，喺英國金頓馬場角逐途程二千四百米膠沙地三級賽九月錦標，結果在老拍檔戴圖理胯下，全程以輕鬆姿態領放，擊敗今年英皇錦標亞軍「晶瑩汪洋」，表現非常出色。賽後練馬師高仕登坦言「成全寶」今仗只係得八、九成狀態水準，惟馬后戰鬥力依然強橫，最終能夠輕鬆贏馬而回，練者當然相當開心，亦為下個月力爭衞冕法國凱旋門大賽打咗支強心針，屆時大家又可睇到此匹馬后表演了。