香港馬遠征海外大賽機會唔少，但講到全華人班底就唔算常見，對上一次贏馬更要數到八年前姚本輝同黎海榮憑「極奇妙」合作，爆冷勝出日本一級賽短途馬錦標。不過，月中同樣一幕差少少就有機會歷史重演。徐雨石馬房嘅泥地好手「藍天堡馬」（圖13號）出戰韓國短途錦標，原本對佢都唔係咁大期望，一來排在最外十三檔，唔多唔少都削弱爭勝機會，二來港隊近年除苗禮德馬房隻「積多福」外，遠征海外泥地賽嘅成績乏善足陳。好彩憑住人馬嘅努力成功克服諸多不利因素，「藍天堡馬」最終只僅僅負於日本一級賽盟主「爵士藍調」跑獲亞軍，真係非常難得，令人驚喜就係梁家俊嘅表現，事關在轉入直路嘅時候，「藍天堡馬」俾隻「爵士藍調」連續碰撞多吓，但梁家俊冇被佢拋窒不特止，更淡定保持自己跑線，力策至最後一步始僅敗，確有大將之風。據知馬匹以短距離落敗，賽後梁家俊同徐雨石曾向韓國賽馬會提出抗議，可惜因為香港及南韓的賽例不同，最終不獲小組接納。不過每一次代表香港去到唔同地方出賽，對騎練來講都係好好嘅經驗，期待未來有機會一圓揚威海外嘅夢想，估計想睇梁家俊再次衝出香港，或者最快都要等到來年「藍天堡馬」遠征杜拜，但汲取過一次外地作戰經驗實有裨益，屆時只要有運氣眷顧的話，應該可以幫華將一哥增添進帳。