上星期兩匹賽駒短短三日意外去世，事有湊巧兩駒馬主俱為城中名人，先有上周一商界名人郭少明囡囡郭詩慧名下「美麗寶貝」，於下午前往游水途中走甩，最後於馬房範圍撞斃，隔日又有許晉亨同李嘉欣新貴「驃寶」，操練途中受傷人道毀滅，相當可惜。「美麗寶貝」經馬會調查，觀看過相關電視影像，及了解過各位相關人仕口供後，裁定事件實屬意外，並無任何人需為事件負責。
至於「驃寶」上周三朝早於內圈由助手策騎踱步，當踱畢之後，助手感到馬匹動作唔妥，慢慢收停自行落馬，然後拖實馬匹待駐場人員及獸醫前來協助，作進一步檢查。據了解「驃寶」於該課操練中傷腳，經檢驗後傷勢不輕，需要人道毀滅，繼而馬會官方已宣布退役，而呢匹八十五分嘅法國自購馬，來港前成績甚佳，曾贏過三級賽，係羅富全精心挑選揀手貨，早定下跑今季打吡為目標，可惜未跑已操跛退役。「驃寶」馬主許晉享同李嘉欣兩夫婦，近年在馬圈活躍且不少愛駒表現均不錯，好似「一寶」兩勝二級賽、「貳寶」曾摘下廣東讓賽盃，而幕後為愛駒改名，近年以「一寶」開始改到去季「七寶」，期間跳咗「三」同「五」，今季順序嚟到「八」，不過唔知係咪以前有馬主用咗「八寶」個名，呢次愛駒就攪攪新意思，唔用數字改用「驃」，結果出師未捷，可以講唔係幾好彩。