民主黨舊年帶住黨員林子健出嚟開記者會，聲稱林子健喺旺角鬧市俾人擄走，仲俾人施以「釘書機釘大髀」嘅「酷刑」，點知件事越揭越多疑點，釘書健仲因此被控，隨即就俾民主黨用完即棄。不過，黃大仙區議員譚香文似乎就好環保，抱住人棄我取嘅精神，請咗釘書健做兼職助理。有人就質疑釘書健咁樣違反民主黨黨規，不過算啦，你估民主黨仲會想理佢咩？
釘書健前日用「譚香文議員辦事處」嘅名義向傳媒出稿，證明佢已經成為譚香文嘅員工。譚香文回應傳媒有關查詢時話，覺得釘書健喺政策、地區規劃「有豐富經驗」，所以請佢喎。至於釘書健有冇同佢自己個民主黨申報，譚香文就話唔知。
釘書健形象插水都有人接收，唔少網民都驚訝譚香文嘅決定。「Dinah Tang」嘲諷譚香文請咗塊「生招牌」。「黃祥」認為︰「物以類聚，同樣垃圾堆！」「PK Tang」狠批︰「白痴議員找個低智商嘅騙子做助手，兩件垃圾！」「NG Ka Chun」揶揄︰「從政只係呃飯食。」
「Hang Yee Wong」就認為︰「其實佢（譚香文）又係做戲啫。唔使咁認真。」咁又係，民主黨咁樣用完即棄，譚香文咁做咪好「義氣相挺」囉。 ■香港文匯報記者 甘瑜