■化晒妝、着住露臍T恤，冇紮頭髮嘅何嘉柔，就憑佢加條𡃁仔，想搬走咁大碌樹幹？「香港眾志」fb圖片打風日子天都未光想喺馬路度清樹應該點做？一般人都戴好頭盔着好反光衣，但「中箭（香港眾志）」就覺得冇頭盔、露臍裝、着黑衣喺漆黑嘅街上嘗試清理倒塌樹木都冇問題㗎，最緊要化個靚妝、影輯靚相啫。執完啲樹枝？捩手掉落山坡咪得。不過，佢哋覺得冇問題，市民就唔係咁諗，唔少人都出post留言鬧爆佢哋因為選舉近了，所以做show抽水，兼且冇常識、越幫越忙，着黑衫企喺漆黑馬路度唔知係咪想陰司機、掉樹枝落山坡阻住去水位唔知係咪想執死啲清潔工人，甚至可能造成山泥傾瀉。 ■香港文匯報記者 甘瑜
成個城市俾「山竹」打到凌亂不堪，唔少市民都想幫吓手，但有啲政棍就覺得係做show好機會。話說「中箭」幾個成員噚日凌晨天都未光，着住同背景一樣黑嘅衫，企喺大馬路度「移除倒塌的樹木」喎。
黑衫企馬路 搬樹無頭盔
睇返佢哋嘅相，成為鏡頭女主角嘅何嘉柔仲化好妝、着住露臍T恤，頭髮都冇紮咁出嚟「勞動」𠻹。相中仲見到佢哋兩個人笑笑口咁疑似想抬起棵大樹，認真牙煙。仲有啲相影到，所謂嘅移除並唔係運走啲倒塌樹木，而係捩手掉落山坡，真係「多謝晒喎」。
「無敵神駒」仇思達好快就出post鬧爆呢班「中箭」細路︰「呢班政棍擺明做騷表演，搬樹幹竟然著（着）露臍裝短袖衫，好容易受傷；安全帽唔戴，隨時塌樹即爆頭；馬路工作不穿反光衣，分分鐘車禍；打掃樹葉，連掃把都無；大型樹木枝幹亦不宜人手搬動。拜託佢地（哋）唔好再叫人去癲。」
發現佢哋掉啲樹木落山坡當清理之後，仇思達再出post鬧︰「『香港眾志』呢班垃圾真係低能！成棚人話就話清理街道，點知掟晒啲樹木殘枝落斜坡，想執死啲工人咩！斜坡啲去水口塞咗，更加會引致山泥傾瀉，會害死人！有無腦架（㗎）呢班懵薯？」
中大「獨」講師劉正都喺「無神論者的巴別塔」個專頁度話，如果「中箭」班人走去杏花邨、鯉魚門執吓垃圾係冇問題，而「中箭」班人嘅行為只係反映佢哋係「一班充滿計算嘅成年政棍」，「點解咁多樣唔做走去做最大堆頭、最有視覺同戲劇效果同最危險唔應該一般市民走去做嘅搬樹？」
同「中箭」秘書長黃之鋒寫親字都會捉到錯別字咁，「中箭」呢個舉動都俾唔少網民指出問題，無論喺神駒個post定「中箭」嗰邊嘅post都係一片罵聲（見表）。
不過唔理大家點鬧，有啲人都係堅持己見㗎，例如「中箭」常委廖偉濂就覺得神駒話佢哋係為咗鬧爆「政敵」喎。
佢聲稱，「中箭」班人只係幫手清「小型垃圾」，「我真係唔明點解咁都有得×。」
廖偉濂死撐 被網民圍插
咁網民又唔係盲嘅，好快就有人留言反駁。「Cheng Sze Lut」就話︰「但你地（哋）要著（着）反光衣同戴頭盔。」廖偉濂就聲稱「太急搵唔到」反光衣喎。「Yan Ting Lam」直言︰「搵唔到就唔好去啦×頭。」
同「中箭」友好嘅袁健恩都留言話︰「冇反光（衣），都可以揀白色/鮮色衫，點都好過忍者咁嘅色呀。」
工黨社區幹事趙司律亦叫佢哋下次唔好：「有乜嘢搖搖欲墜，係果（嗰）下（吓）飛埋嚟，輕則撞傷，重則無命，要做足準備先好去。」
「Raphael So」亦反問廖偉濂︰「人地（哋）有話錯你d（啲）咩？你依（𠵱）d（啲）叫越幫越忙，自己冇危機意識去處理一陣出事又要送你入醫院。」
「WS Wong」質問︰「你地（哋）攬住棵冧咗嘅樹影相，原來係呼籲人清『細垃圾』？」有人就揶揄：「成百幾磅重嘅樹你地（哋）兩條友想笑住咁逗（𢭃）起佢，佢哋嘅政治手腕真係唔講得笑。」
帶埋攝影師 因為選舉近
「Billy Rex Chow」就揶揄佢哋：「最重要係帶個攝影師去執樹 #嗚呀影得真係好唯美呀。」「Andy KC Ng」則突破盲腸：「補選近了，小政棍要做show，祝你地（哋）『泛民』輸多鑊！」「Ka Wang Chen」也道：「成日諗住做政棍，做埋政棍show腳搭（踏）實地搵返份工啦！」
網民鬧做騷唔用腦
Wang Leung︰先唔好講清樹枝專唔專業，咁樣彎低身搬重野（嘢），條女頭髮又唔紥（紮），基本職安健已經唔合格啦。
Kin Wai︰去玩呀！基本（要着）反光衣戴返安全帽啦！著（着）露臍裝不如著（着）比堅尼執樹枝呀××××！
Yuen Siu Mo︰做大戲，添煩添亂！
Zeta︰我係駕駛者多得你哋唔少，避樹又要避人，仲要係黑色。我避樹玩越野賽咁已經好辛苦，仲要避你班傻×，我前世做錯啲咩？
Tammy Kan︰執完啲樹又掉返落山，自已（己）加重左（咗）人地（哋）啲負擔都唔知。
Olive Wong：食環署工人要攀入欄內清走斷樹，是不是另類危險呢？用吓腦喇唔該！
Vincent Kwok：有朋友做樹藝工作，話佢地（哋）咁做，工人要遊（游）繩落去執，做多好多功（工）夫。
資料來源：fb留言
整理：香港文匯報記者 甘瑜