■馮檢基fb一個關注樓宇安全嘅帖，竟有唔少反劉小麗嘅留言。 馮檢基fb截圖有乜嘢喺小麗老千（劉小麗）個facebook專頁度睇唔到，但喺老馮（馮檢基）個fb度睇到？咪就係鬧劉小麗嘅留言囉！開晒聲話要參加立法會九龍西補選嘅劉小麗，近日黐嚟黐去黐知名度黐功勞，十號颶風「山竹」襲港時分享吓教協要求教育局宣佈停課嘅post，咪當自己有份爭取囉。不過，一班教協會員就不滿佢借教協知名度扮嘢，疑似留言質疑佢後俾人刪留言。有冤無路訴，唯有走去老馮度揭露小麗老千嘅霸道面目囉。
圍插小麗抽教協水邀功
老馮近日喺fb出post關注天災下嘅樓宇安全，但樓下就唔少反劉小麗嘅留言。
「Chun Hin Tang」話，自己當時留言叫小麗老千唔好抽水，講明大把老師唔鍾意佢，結果就俾人刪post，「基哥，我問小麗老師點解亂用教協POST。 我地（哋）一班做老師會員都無話支持佢。跟住佢就把我留言隱藏，又滅我聲。乜『民主派』會滅聲架（㗎）咩？ 乜我問下（吓）都唔得咩？......你可否幫我伸張正義？」
講到共同敵人小麗老千，老馮嘅「正義感」即刻冒晒出嚟，回覆呢位教師話︰「一D（啲）『非建制派』對我不但要滅聲，而要我被消失！香港發聲渠道多的是！不要放棄，講民主，就要行民主！大家努力！」
「吳匠桉」都留言講小麗老千︰「基哥平（評）平（評）理，劉小麗亂用教協post，一班老師會員都無話支持佢！」老馮就覆︰「若是支持民主的，絕對不會把不同的意見删去！有云：縰（縱）使我不同意你的意見，也會誓死保衞（衛）你的發言權！」
「Matthew Hui」即刻畀位老馮上︰「基哥你作為長輩應該教導下（吓）啲後輩。 唔會解釋或者唔啱聽都唔應該刪除留言。......作為攻（政）客， 幾唔啱聽，幾唔願意面對都應該要畀個答覆， 但絕對唔應該係delete post（刪文）。」
「麗粉」反質疑做媒搞事
不過，有小麗老千支持者就試圖反擊。「Pang-fei Lam」質疑班人做媒話︰「走來老基哥臉書，力數劉小麗不是：挑撥離間，用心狠毒，十惡不赦。」
睇返小麗老千個fb，又真係見唔到呢啲留言喎，不如佢講吓有冇刪過人留言先啦。 ■香港文匯報記者 甘瑜