■鍾舒漫(左二)與dancers的專業表現廣獲好評。香港文匯報訊（記者 植植）日前，歌手鍾舒漫（Sherman）在西貢出席活動，當日要演唱三首歌的她唱到其中一首快歌《小碎步》時，突然發生意外沒有了音樂，不過Sherman臨危不亂，與兩位dancers繼續唱繼續跳，台下觀眾見到都拍晒手歡呼。
表演完當晚，Sherman將這段小插曲片段放上IG，得到同門師兄張敬軒表揚，軒仔在自己的IG repost，並留言讚Sherman叻叻豬，還提到唱快歌遇到這些情況是特別不容易，「呢啲係天分，亦係無數次努力排練嘅成果，好鬼叻吖」。而師姐容祖兒亦都留言：「這就是勤有功，叻叻sher sher」。除此之外，「高登瓊姐」都忍不住在facebook出post，大讚Sherman專業，「其實香港樂壇主力做快歌嘅跳唱歌手真係買少見少，Sherman呢幾年一直堅持做快歌，今次show到跳唱歌手同dancers嘅專業，掌聲畀Sherman、兩位dancers同救場人員。」
得到軒仔、祖兒和瓊姐「加持」，Sherman話完全冇諗過：「我post出嚟純粹想多謝排舞老師Rock sir、dancers同晨曦個個都咁專業、咁配合。我淨係覺得每一場有咩事都要盡力做，最緊要係enjoy個show同埋我好感受到好多愛，包括排舞老師Rick sir嘅beat box，同埋晨曦上咗嚟，台下觀眾又畀support，雖然係意外，但係現場我好感覺到，我喺台上面都做得好開心、好投入。」