譏李卓人九西零票點𠝹 批小麗入工黨「妹仔大過主人婆」
呢排成班反對派大佬日日都針住想參選嘅老馮（馮檢基）嚟打，似乎老馮終於都忍唔住嚟個大爆發。「無敵神駒」仇思達上星期六晚開台，請埋老馮盡訴心中情，老馮都愈傾愈入肉，恥笑「你呃人」（李卓人）喺九龍西得零票，自己點樣𠝹佢票，又寸小麗老千（劉小麗）入工黨嘅做法好核突，話係「妹仔大過主人婆」。咪話神駒唔公道呀，其實神駒除咗有請老馮之外，都邀請埋小麗老千㗎，點知佢就請神駒食檸檬。有網民就話，小麗老千都未交代到之前話捐一半人工嘅承諾，心虛都好正常嘅。■香港文匯報記者 何西
神駒前晚開台會佢班益友，順便問老馮點睇班反對派係咁「屈基」。被問到係咪想出嚟𠝹票，老馮澄清話，如果小麗老千入到閘，佢就唔會出嚟選，所以一定𠝹唔到小麗老千嘅票。至於Plan B「你呃人」，老馮就寸佢又未選過九龍西，「手上得零票，票都冇張又點𠝹到」。
老馮又質疑反對派班人係咪以為班選民可以玩弄喺佢哋手上，以為佢哋叫選民投乜就投乜。佢話，要相信選民嘅決定先叫係真正嘅「民主」，明寸班反對派「假民主」。
小麗老千獨裁玩「欽點」
小麗老千同外人夾埋趕盡殺絕老馮，昔日黨友、民協何啟明亦一再「提醒」，話老馮今年3月個立法會九龍西補選已經講過係「最後一次參選」。老馮反駁話，「你呃人」以前都講過最後一次選，仲話要留機會畀班後生，如果班反對派鬧佢，其實都係鬧埋「你呃人」。老馮又話，其實呢次自己都係焗住出嚟選，純粹睇唔過眼小麗老千獨裁「欽點」，反對派又「反民主」咁款唔肯搞「初選」。老馮爆料話，其實明明有其他後生都想做「Plan B」，結果一俾小麗老千行封建制之後先冇晒聲氣，都咪話唔「民主霸權」。
老馮愈講愈過癮，大爆「民主動力」之前傾過，如果有參選人被DQ，同一黨派嘅人就可以優先補上，變相就解釋咗點解小麗老千咁急住「下嫁」工黨，其實就係要確保你呃人做到佢個「Plan B」。
老馮批評呢個行為極度肉酸，又揶揄𠵱家情況係「妹仔大過主人婆」，小麗老千竟然可以主導埋工黨，又寸「你呃人」不如退工黨入「小麗民主教室」好過，連神駒都加把口話「李卓人入小麗……個教室咪得囉！」
益友笑老千淆底怕見神駒
聽到老馮咁講，唔少益友都鬧爆小麗老千假民主、真獨裁。「Jimmy Caesar」就話：「佢號稱『民主派』，從來不民主！其實係老千，口講民主，意思係你哋係民，你哋要選我做你哋嘅『主人』！死老千！」
「Mui Ying Ling Allard」就恥笑小麗老千淆底唔敢應對神駒，先至請佢食檸檬：「益友們不知多熱烈歡迎大方接受仇先生訪談的馮檢基先生啊，好過乜叉狗屁不通的亂噏口號之『平凡幸福』之小麗呀，她不敢面對仇先生的邀請喎，是不是心虛呀？」
「Cora Ho」就覺得小麗老千驚俾人踢爆冇兌現當初選舉承諾捐半份糧，所以就唔敢會益友：「咁好機會畀佢解釋吓捐咗啲錢去邊，竟然選擇逃避，呀劉小麗前議員係咪心虛呀？」
「網議政事」《蘋果》東施效顰
話說《蘋果日報》好似都學緊香港文匯報寫「網議政事」，「報道」咗呢壇嘢，結果網上意見似乎就唔太buy啦，話佢係跟尾狗之餘水平又冇香港文匯報高，中大「獨」講師劉正亦批評︰「《蘋果》又要報神駒，但又要撐『飯（泛）民』，就唯有隱瞞事實、扭曲內容。」算啦，對上補選嗰次，姚松炎輸咗《蘋果》即刻「報道」老馮「唔幫手」，唔通你旨意《蘋果》幫老馮主持公道咩？