昨日國慶賽馬日，成績最好嘅練馬師係大摩及賀賢，兩人均起孖，尤其係大摩過往三季喺國慶盃賽馬日都有馬贏，今年亦唔例外，一開場就贏隻「蓋世之寶」頭威頭勢，呢隻「蓋世之寶」上季跑兩場直路賽都係影相之下被氣走屈居亞軍，今戰季內初出兼由十三少韋達執韁即贏馬而回，大摩話隻馬做過喉部手術，不過已好番，佢認為隻馬跑千二會更好。之後去到第八場國際三級賽慶典盃，大摩就憑馬王「美麗傳承」起孖兼捧盃，隻馬今場負頂磅都能跑出接近紀錄時間，大摩話下一個目標係跑東方表行沙田錦標，然後到馬會一哩錦標，再到國際賽。而賀賢就贏第四場嘅「七十七十」及尾場「小巨人」，賀賢表示，「七十七十」之前戴眼罩效果麻麻，今戰試吓唔戴終於贏到，認為隻馬會繼續進步；「小巨人」休息十二個月都贏得，賀賢話隻馬千四及千六都冇問題。同日另一項三級賽國慶盃就由蔡約翰馬房包Ｑ，由田泰安策騎「旺蝦王」壓倒由潘頓執韁嘅上季最佳短途馬「天下為攻」奪冠。另一位前領練馬師苗禮德繼續保持有頭馬進帳，喺第六場由徒弟仔黃俊騎隻「鋒芒畢露」，又一次殺敗「佳知武仕」，保持在田草千六米兩戰全勝，賽後苗禮德話上次跑谷草一哩放得太急，今次控制好些就順利補中。
騎師最威水係潘頓，四喜臨門兼包辦三寶，除幫賀賢贏「七十七十」及「小巨人」外，喺第七場騎大摩隻「美麗傳承」捧走慶典盃；到第八場又替羅富全贏隻大熱門「好運多贏」，並以六十分成為騎師王。