唔計山竹取消嘅賽事，到目前為止，跑咗七次，其中三次為夜賽，四次為日馬，丁冠豪在三次夜賽中，每次都有頭馬進帳，而且都係贏五班馬，好似第一次夜賽，贏隻「飛壹般」（圖12號），第二次夜賽，又贏隻五班嘅「幸運神駒」，到咗上個禮拜三，馬房又有隻「奇妙星光」贏，一連三次夜賽，都見到呢個馬房有頭馬拉，而且特色就係贏五班馬。
呢個現象不其然諗起上季羅富全開倉嘅時候，主力都係贏五班馬，結果後來馬迷稱佢為五班王，因為可以憑着一手五班馬贏得多場頭馬的確唔簡單，因為呢類五班馬喺上手馬房多數搞到頭都大埋。
正如今季丁冠豪一樣，季初搏成績，只能靠呢批五班馬，因為只要搞好馬匹本身問題，以佢哋現時所評嘅分數，是有本錢力爭上游。好似今次五班賽列陣嘅「飛壹般」咁，上季評十八分喺谷草一哩贏「戈寶」，之後轉戰田草千六米，評廿五分跟「喜之星」串Q，一隻可以適應田草千六米及谷草一哩嘅馬，質素自然唔會差得去邊，但係贏完場谷草一哩後，要到今季轉由丁冠豪訓練至重見天日。唔好理丁冠豪功夫好，抑或行運醫生醫病尾，總之呢一類馬俾新接手練馬師訓練可以立竿見影，短期內當佢藍籌咁買就啱，多數唔會令人失望，因為未獲適合練馬師訓練前，評分經已減過龍，現時只係止跌回升，再睇上次「飛壹般」贏谷草一哩過程，跑法與開齋時戰術雖是一樣，都是用且放且走方式，但今次所贏姿態，末段是越放越勁，彈離對手取勝，並不是開齋嗰次咁，放到終點前僅僅捱到，好險咁贏對手。今季所見馬匹鬥心湧現，雖然贏馬後被小組加七分，但呢個分數依然未對「飛壹般」構成阻力，丁冠豪相信可保住每次夜賽均有頭馬進帳嘅佳績之餘，呢隻五馬班必可成為丁廄嘅招牌馬。