上個禮拜六，「巴基」系馬主丁志強喺九龍城廣場搞咗個聯歡宴，擺咗四圍宴請告東尼馬房班手足，多謝佢哋咁用心照顧兩隻「巴基」仔，有出席呢個聯歡宴嘅手足講，每圍起碼過萬蚊，因為席上佳餚真係唔係話食就有得食，酒樓待應同班馬房手足講，要一早同船家訂先至有，否則要搵齊四條黃皮老虎班真係唔容易。除告東尼夫婦到場外，仲有騎師田泰安同女友，由於「巴基」系今季帥權將會移交俾田泰安，所以佢自然要出席。不過，大家只要細心睇睇今季告東尼呢個倉，出擊馬多數靠田泰安，早前告東尼馬房一日三W，全交田泰安操刀，即係講俾大家聽，呢對騎練未來會加強合作，田泰安近期騎告東尼馬，隻隻搏晒命，上次夜賽又以「萬事欣」建功，呢次夜賽，告東尼又有兩件實力馬安排俾田泰安跑，一隻「華美之寶」，另一隻係「勁哥兒」，當中「華美之寶」跑第三場四班一哩，呢一系馬一直支持開告東尼，正如「萬事欣」馬主伍燕梅，只要得到呢批嫡系馬主支持，日後要喺告東尼馬房立足就可以事半功倍。講番呢隻「華美之寶」，近兩季贏馬都屬季初戰，前季第二仗由韋達贏谷草一哩，呢場屬三班賽，上季初出谷草一哩得第四，跟住兩仗得一冠一亞，均屬四班賽，馬房一早摸熟呢隻馬性能，只會集中喺季初搏殺，因為呢個時候體力最好，假如季初贏唔到，以隻馬目前七歲之齡，贏馬真係要等運到，呢次由田泰安操刀，又係考鞍上人牌嘅時候。