logo 首頁 > 文匯報 > 香港專題 > 正文

【網議政事】網民寸小麗昨非今是

2018-10-03

小麗老千(劉小麗)喺前年選舉嗰陣,死都唔肯簽確認書,表明擁護「香港是中國不可分離的部分」等基本法條文,仲特登寫文寸簽咗確認書嘅熱狗(「熱血公民」)阿蟲泰(鄭松泰)跪低𠻹 (見圖)。但過咗兩年咁多啫,佢就嚟個急轉彎,為咗可以喺九西補選「入閘」就粗粗哋簽咗佢嘞。又難怪嘅,為咗九萬六,佢仲有啲乜嘢係做唔出吖,難怪有網民唱埋佢心聲出嚟:「為兩餐乜都肯制呀前世!」

「重要關頭會否為一己私利」

小麗老千當時篇文係點名回應蟲泰嘅,睇落非常義正辭嚴,話政治人物最重要係喺大是大非嘅問題上堅守原則,唔會砌辭掩飾自己嘅軟弱,「政治人物的操守,反映他在重要關頭會否為一己私利而背棄選舉承諾,他的可信和可靠程度,是市民選擇一個代議士的重要根據」,仲話要「挺直腰板」,叫所有「非建制」候選人抵制確認書𠻹。然後,佢噚日簽咗確認書。

原則去咗邊?承諾仲喺唔喺度?「Chan Wing Kin」就話嘞,小麗老千簽咗份連自己都唔相信嘅確認書,「為咗呃返個席位可以去得幾盡呢?」「Kam Sum Chan」就「讚」佢真係實際,又話如果法例要求參選人除褲,睇怕佢都應該會第一時間除褲。

「Albert Wong」就用返句政壇金句:「有得入閘屎都食!」「Danny Lee」仲歌神上身𠻹:「為兩餐乜都肯制呀前世!」 ■香港文匯報記者 陳庭佳

讀文匯報PDF版面

新聞排行
圖集
視頻