今個禮拜六有唔少初出馬列陣，不過有隻蔡約翰質新馬大家一定要留意，所講並唔係嗰隻「首飾大聖」，因為呢隻馬上次失驚無神獲季軍，呢次由潘頓騎肯定熱到無味。呢次有隻初出馬「傑彩繽紛」（圖白色綵衣）角逐第八場二班千六米草地，由祈普敦騎，假如無估錯嘅話，呢隻馬係蔡約翰有心益祈普敦食糊嘅。
呢隻馬來香港前只贏過場千四米，取勝過程是以凌勵後勁贏馬，之後有關人等將隻馬部署跑級際賽，最後一仗跑二千四百米澳洲打吡大賽，鞍上人係麥維凱，輸十多個馬位，但再數之前跑幾場二級賽，陣上都經常走近，所以呢隻馬質素二班一定夠，輸完澳洲打吡就賣咗俾現時呢位馬主羅德榮。羅德榮以個人名義，計埋「傑彩繽紛」，經已養到第四隻，第一隻係○六年購入，命名為「駿馬繽紛」，養喺蔡約翰馬房，到退役時贏咗三場，算是不過不失成績，養完「駿馬繽紛」後，二○一○年再入過隻「盈彩繽紛」，呢隻馬一共贏八W，首季一口氣連勝七場，翌季再贏多一場，但因為隻腳有問題，玩咗兩季就退役。到咗一四年，再買咗隻「詠彩繽紛」，呢隻馬替馬主總共贏出十場頭馬，又出去跑安田，呢隻亦係一出即勝馬。換句說話講，羅德榮除首隻所養嘅「駿馬繽紛」未能做到一出即勝外，接住兩隻愛駒都能做到一出即勝目標。呢隻「傑彩繽紛」一出跑千六米，路程雖然並非最佳，但一定合性能發揮，再睇馬房替呢隻馬嘅準備工夫，「傑彩繽紛」一啲都唔悠閒，賽前共彈過三課大閘，最近一課係上周四喺從化試千二米泥地大閘，輕鬆得一席第三名，呢類未見底嘅自購馬，隨時可以一嗚驚人，信任呢件綵衣，正如信任「首飾」系一樣，唔會入啲質庸貨，要吼實力馬，又要有賠率，呢隻「傑彩繽紛」最值得推介。