■熊黛林稱現在家中有兩隻狗和兩個囡囡更加熱鬧。香港文匯報訊（記者 李思穎）熊黛林（Lynn）、周秀娜、許志安、陳凱琳等前晚出席頒獎禮活動，同場的溫碧霞穿上低V露背裙，王君馨則胸前透視，性感程度爆燈，相當吸睛。育有一對六個月大孖女的Lynn，已開始為BB搵學校，但當提到舊愛郭富城也有一歲女兒，兩位家長大有機會湊女返學時碰頭，Lynn顯得尷尬指還未知女兒會讀哪間學校。
熊黛林經常在社交網分享一對半歲大孖女Kaylor和Lyvia的可愛照片，她開心說：「她們每日都發生不同事，所以每天幫她們影相，三、四個月開始發音像叫爸爸、媽媽，見到兩個BB對話好得意，可能兩個互相練習會快些。兩姐妹沒有打架，反而會錫對方，囡囡都開始留意家中小狗，有次小狗突然跳上去妹妹身邊，嚇死我，原來是想錫妹妹一啖，我亦從沒有想過放棄養兩隻狗，一直都視牠們如仔女般看待，現在家中有兩隻狗和兩個囡囡更加熱鬧。」Lynn指兩姐妹性格有分別，姐姐較淡定老積，總是望住你不作聲，妹妹稍有不快便呱呱叫，雖然長得高過和大隻過家姐，但很嗲，一睇就知邊個是妹妹。
Lynn已開始着緊幫囡囡搵學校，她謂：「原來我已經遲好多，好多媽媽佗住BB已經物色學校，我都未知要報幾多間，由老公決定。」說到前度郭富城的囡囡剛滿一歲，不排除彼此的小朋友報讀同一間學校時，他們有碰面機會，Lynn尷尬笑說：「無諗咁遠，唔知有咩學校，睇下有邊間收先，兩個女讀同一間比較難，我就想是國際學校，因見到很多幾歲小朋友已經開始補習，我怕囡囡太辛苦。自己都有向家姐（大姑奶郭可盈）取經，她女兒津津都是讀國際學校，讀得幾開心，本地學校都好，但好辛苦，我驚自己的壓力大過BB，(你是緊張媽媽嗎？）暫時未知，但都有少少，每樣東西都要買兩份，壓力都兩份，好恐怖。」
娜姐着高跟鞋行似企鵝
見周秀娜一拐一拐而來，她表示：「早前拍動作片，仲要着住高跟鞋跑，我天生有高弓足，醫生都話不適合長期着高跟鞋，可是我貪靚加上工作需要，累積下來引致腳痛，拇趾外翻，所以不用工作時便會除鞋休息。近日為電影謝票都以波鞋上陣，醫生建議我加鞋墊，我都知現在着高跟鞋行得唔靚，似企鵝。」
娜姐透露完成電影宣傳，會有假期，到時便去看醫生處理腳痛問題，亦有意出外旅行，問是否約異性一齊去？她說：「隨緣，有人約我都隨時歡迎，但暫時未遇到適合的人，好少人似張繼聰，一個打十個，出席謝票活動做埋司儀同保安，大隻又幽默，（鍾意呢類型男士？）幾好呀，傾到偈又識逗你開心，有危險時又可以保護你，謝安琪好幸福，也不明白為何同我拍檔的另一半老婆或女友，都對我好放心，我要自我檢討下。」