香港文匯報訊（記者 陳川）民主黨新界東支部退黨事件花生食極未完。前晚宣佈退黨嘅北區區議員劉其烽，公開批評該黨新界東立法會議員林卓廷未根據黨內機制經他這個「師父」的同意，就安排郭㙟豐由聯和墟轉到天平西服務，係唔尊重佢。民主黨北區黨團召集人陳旭明就發聲明話劉其烽指控失實。劉其烽就話對方喺度混淆視聽，仲暗示喺呢件事上，林卓廷喺度造馬，點名叫對方交代清楚。
繞過「師父」太霸道
劉其烽喺交代自己退黨原因時狠批林卓廷漠視黨內機制：話說民主黨社區主任郭㙟豐原本喺聯和墟開展工作，但林卓廷就要求將郭㙟豐調去天平西，更繞過他這位「師父」，直接將「轉區」申請提交民主黨中委會。
不過，陳旭明就喺聲明中話，郭㙟豐喺加入民主黨成為社區主任初期，已經希望喺天平西服務，但劉其烽就話自己個助理張京樑都有興趣喺呢區，所以佢建議劉其烽邀請張京樑加入民主黨，若對方同意加入，就會支持佢考慮參選天平西。
佢話，係劉其烽要求郭㙟豐先到聯和墟服務，觀察吓�嘅表現，再決定係咪適合喺天平西服務，佢自己同林卓廷於是建議，如果張京樑拒絕加入民主黨，郭㙟豐就可以按初衷喺天平西服務，當時「劉其烽沒有異議」。
陳旭明反指有傾好
陳旭明聲言，有「天平邨居民代表」參與過該黨北區黨團討論天平社區主任嘅會議，「居民代表」表明只會支持民主黨派出的代表，而張京樑其後拒絕加入民主黨， 北區黨團先會決議由郭㙟豐出任天平西社區主任，仲批評劉其烽今次係因為自己助理嘅利益扭曲事實，意圖中傷林卓廷同郭㙟豐，並對此表示「極度憤怒和遺憾」喎。
劉其烽喺接受傳媒訪問時就反駁話，郭㙟豐從未主動要求喺天平西服務，當時嘅情況係林卓廷話「有位年輕人希望在上水落區」，而劉其烽綜合上水區內情況後，建議林卓廷安排郭㙟豐喺聯和墟服務，大家都一致同意。
佢又批評聲明中話「觀察其（郭㙟豐）表現，再決定是否適合在天平西服務」係混淆視聽，話自己當時嘅想法係先觀察郭㙟豐喺聯和墟嘅落區表現，再決定係咪支持佢喺聯和墟參選，由始至終都同天平西無關。
劉其烽又提到陳旭明特別喺聲明中提到「居民代表亦表明只會支持民主黨派出的代表」，話當日民主黨北區黨團討論天平社區主任嘅會議，的確有一位「居民代表」參與討論，「但該位人士的身份和背後的關係，則希望林卓廷親自交代清楚。」