■陸頌雄製圖揶揄黃鶴鳴。陸頌雄fb圖片反對派不斷借華為CFO孟晚舟被加拿大拘押一事抹黑特區政府。近日，公民黨成員、身為律師嘅黃鶴鳴，就撰文話孟晚舟成為咗香港永久居民，就等於「放棄咗中國籍」喎！工聯會立法會議員陸頌雄就頂佢唔順，發帖揶揄佢身為律師，犀利到可以無視中國國籍法嘅有關規定，「搵你打官司實掂喇！」
唔少人或者唔多記得黃鶴鳴係邊個，佢就係令港珠澳大橋工程被拖延咗近9個月、白白虛耗港人88億元公帑嘅司法覆核官司裡面，代表曾任公民黨義工嘅朱綺華嘅代表律師。當時，朱綺華輸咗官司後，就大爆話自己根本「無心搞」，只係「佢哋」叫佢打官司。
當時，黃鶴鳴話係法援署將呢單案「分派」畀佢嘅，試圖劃清界線，但自稱朱婆婆「契女」的鄭麗兒當年喺接受《南方人物周刊》訪問時，就踢爆係公民黨員「畀咗一個地址」佢，等佢哋「搵到」黃鶴鳴嘅。身為律師嘅黃鶴鳴「幾有誠信」，就此可見一斑啦。
見外交部發聲乘機抽水
話說喺加拿大法院聆訊孟晚舟嘅保釋申請時，公開嘅呈堂資料話佢同時持有中國護照同香港特區護照，黃鶴鳴就想乘機抽水，撰文話「當孟晚舟成為香港永久居民，並持有有效特區護照時， 便即和你我一樣是香港人，亦理應代表已放棄了中國籍」，問道：「為何自孟女士被捕後，港府對這位香港人的遭遇卻可以置身事外，並任由中國外交部繞過港府，為這位應已放棄中國籍的女士抱打不平呢 ？」
所謂「架係自己丟」，陸頌雄昨日就喺fb發帖，揶揄身為律師嘅黃鶴鳴等「護主派」連日衝出嚟，「幫美國轉移視線甚至擋子彈」，仲引用《中華人民共和國國籍法》寸爆黃鶴鳴。
佢話：「成為香港永久居民等於放棄中國籍！嘩！原來我哋一直都唔係中國人呀......」然後就引用《中華人民共和國國籍法》作解釋：「凡具有中國血統的香港居民，本人出生在中國領土（含香港）者 ，以及其他符合《中華人民共和國國籍法》規定的具有中國國籍的條件者，都是中國公民，即係中國籍。」
陸頌雄譏「打官司實掂」
陸頌雄揶揄黃鶴鳴：「呢位嚟自著名律師行嘅律師真係犀利喇，竟然連《國籍法》都改埋！黃律師咁英明神武，搵你打官司實掂喇！反正佢可以隨意改法律！」 ■香港文匯報記者 陳川
