■董敏莉過去一個月都專心湊女。香港文匯報訊 昨日「拆禮物日」適逢愛女莊子子滿月，新手媽媽董敏莉亦為女兒穿上聖誕裝，第一次感受三人行的聖誕節。董敏莉表示過去一個月都專心湊女，大讚子子忍耐力高：「佢好乖啊，現在個人長高咗好多，我發現佢忍耐力都好勁，朋友的BB有時去咗小便都會喊要人換片，不過子子就會唔出聲，到我地發覺時已經差不多漏出嚟！今年聖誕爸爸唔畀我哋出去玩，所以兩母女留屋企扮靚靚。」
Monie幫愛女穿聖誕衫時，子子「郁身郁勢」，還識用手撐起自己：「可能同我哋玩得多有關，我哋成日同佢玩Tummy Time，佢手臂練到好有力，有人話佢可能好快識轉身！」
初為人母的Monie透露「心理上」已習慣，但被愛女搞到「五勞七傷」：「我抱得太多，搞到現在有媽咪手，有時大動作啲都好痛，唯有放慢個腳步去做嘢，甚至叫老公去開奶同抱個囡，我同子子成個女皇咁享受聖誕節加滿月。（送咩畀個女？）我已經送咗個包包臉畀佢，似足我咁可愛，搞到爸爸都不時獻吻做禮物。」