大凡參與過國際賽嘅馬，未超過一個月再出，十居其九都冇好結果，仲記得上周日洋紫荊短途錦標，六匹參戰馬，僅「天下為攻」跑過國際賽，臨場被捧成不足兩倍熱門，結果得第四名。剛周三夜賽嘅一月盃，參戰馬中有「馬克羅斯」、「鷹雄」、「川河尊駒」、「大雄圖」及「雪山神駒」亦跑過今屆國際賽，結果由三匹未跑過今屆國際賽嘅「精明才子」、「龍船響鼓」及「翠龍」包T。由此證明跑過國際賽嘅馬匹，需要有較多嘅時間回氣。羅富全安排「精明才子」跑一月盃，睇通所有跑過國際賽嘅馬有機會失準，而「精明才子」過終點嘅失蹄，令鞍上人巴度如滾地葫蘆，假如喺前一百米發生，後果就截然不同。呢位新紮練馬師首次派馬跑國際賽即連捧兩大盃，又好似一月盃「精明才子」之勝，練馬師勤力有幫助外，其馬房運氣也係相當好。今周末由二班馬角逐泥地一哩，羅富全出「都靈紅星」及「逍遙自在」兩駒，硬撼師父蔡約翰嘅「估惑」及「精算閃擊」。牌面似乎蔡神仙會秤高些少，但「都靈紅星」及「逍遙自在」也非等閒之輩，尤其係第一志願嘅「逍遙自在」，隻馬季內四戰，僅一次跑泥地一哩便即能上名，與「估惑」串Q，經過連番草地寓賽作操，今次磨利而來，即使再遇「估惑」，「估惑」要負重磅，「逍遙自在」就負輕磅，兩者相距十八磅下，加上狀態拉近，「逍遙自在」顯然已具反勝之力，值得大家追捧呢匹泥地好手。