第六場、第四班、一二○○米。羅富全馬房「星叻」，出自兩歲一級賽藍鑽石錦標冠軍「重要證人」，血統早熟，在港同父馬如「數糊勇士」及「海翡翠」皆在出道不久便交出好表現。「星叻」周歲價八萬澳元，到兩歲再推出拍賣，由新晉香港馬販以十三萬澳元接手，新晉馬販將「星叻」由澳洲運去紐西蘭，搵練馬師做基本工夫，點知越操越正，自己再賣俾現時馬主五粒星團體，咁呢個團體有五粒乜嘢星咁勁？其中三粒有林貝聿嘉、名將夫人鄭惠榮女士，仲有賭王家族相關嘅丁毓珠姐姐，前兩者首次做馬主，戰意肯定鮮明，熱身後隨時郁手。
第八場、第三班、一八○○米。「全才」來港前在愛爾蘭三戰得兩冠一亞，勝途為千六米，當中一場是膠沙地。上季來港後因傷患不少，超過一年無出賽，幾經艱苦如今操起狀態，試問又怎會作保留？此駒今季十二月方出道，跑了一場第四後在元旦轉五歲，及後田草一哩不敵「四通八達」而壓倒「巴基之友」入Q，之後則在二千米跑第三；上次再向二千米進軍，用布文得第五，見末段氣量稍為不足；今次安排縮程轉場上陣對症下藥，擺前且戰且走，具不俗突圍機會。