近年華將相當爭氣，除個別支持太少交不出成績外，大多在陣上均交出合理表現，只不過在本港騎師圈，重洋輕華傳統根深柢固，要一下子改變馬主及練馬師想法着實不易。
最近最熱門的話題，是賴維銘騎「贏馬神器」被研訊的事件，客觀地評論，該場千六米的步速在當日而言是着實偏快，而賴維銘的留放亦可以做得更好，但順跟順走而步速偏快下，竟然亦要押後研訊繼而入罪，就覺得有點那個了，況且，「贏馬神器」同場放頭的「勁得手」反而解釋幾句就過關，那就更令人覺得不公平。
如今競賽小組正式就賴維銘早前騎「贏馬神器」提出四項指控，所謂指控嚟嚟去去都係話賴仔將步速拉得太快，未能確保隻馬爭取最佳名次。單嘢暫時押後再審，但小組嘅決定已一石激起千重浪，連日嚟賽馬傳媒同網上賽馬平台都向競賽小組提出強烈質疑，對小組針對華籍騎師選擇性執法，更加係非常不滿。賴仔當日點跑「贏馬神器」，全世界都有眼睇，若果佢本身跑法有問題，點會有咁多人撐佢？
講到不合理嘅快步速，唔少賽馬傳媒同馬迷都對季初馬會盃「馬克羅斯」同「歡樂之光」鬥燒記憶猶新，呢場馬頭兩段講緊快咗兩秒八八，鞍上人仲要係冠軍級騎師潘頓同莫雷拉，咁跑法都算幫隻馬爭取最佳名次？點解小組賽後又冇好似今場捉賴仔咁，向潘頓雷神提出同樣指控？競賽小組今次俾人感覺，係冇合理理據嘅前提下，隨手捉個華人騎師嚟開刀，講得衰啲直情有砌生豬肉之嫌。其實每次跑馬都有好多眼冤嘅跑法，當中唔少都係幾個前領外籍大師傅經手，但就唔見小組明察秋毫採取行動。若然小組係睇賴仔唔順眼，咪向牌照委員會建議下季咪發牌俾佢囉，反正邊個有冇牌一向任你講，唔需要整色整水攪啲咁難睇嘅小動作。香港賽事達世界頂級，但單係監察賽事公平公正、一視同仁呢一環，今次「贏馬神器」事件已露底，監察偏私經常搬龍門，投注人投訴無門，其他設施做得幾好都冇用。賽馬事務執行總監夏定安，應該盡快同競賽小組首席受薪董事祁禮謙出嚟開記者會，就今次事件向公眾解釋同接受傳媒質詢，家陣全港馬迷都等緊馬會交代。