■媒體標題揶揄「佔中三丑」及「十死士」，這剎那在何方﹖經常危言聳聽嘅反對派，為阻撓特區政府修訂《逃犯條例》，又再故伎重施。自稱基金經理的「2047香港監察」召集人、由加拿大回流嘅錢志健，近日接受《蘋果日報》訪問時話，考慮3年內舉家返回加拿大，因為修例通過「香港就會玩完」咁話。全國政協副主席梁振英（CY）就發帖回帶，話錢志健曾經係所謂「佔中十死士」之一，話會在「佔中」後自首，結果「冇咗件事」，「現在錢志健以為大家不記得他當日的承諾，今天又指指點點，可信嗎？」咁又係，公民黨主席梁家傑夠話過工黨李卓人選唔到做立法會議員，香港獨立關稅區地位「一定不保」𠻹啦，結果咪又係自打嘴巴。
所謂「佔中十死士」，除咗錢志健外，仲包括時為社工的邵家臻、作家陳慧、「主場新聞」創辦人蔡東豪、傳媒人徐少驊、律師鄧偉棕、醫生吳錦祥、中華基督教會香港區會資深牧師郭乃弘、中學通識科教師張銳輝、中學數學科教師潘瑩明，其中大部分都聲言「佔中」後會主動自首，法庭上「不作抗辯」。
蔡東豪摺「主場」又開「立場」
講到咁偉大，好似隨時都會自焚「捨生取義」咁，但唔好話「死」，呢班人就連自首都要走數。其中，蔡東豪「佔中」後話自己「恐懼」結果摺咗「主場」，但短時間就再開「立場新聞」，令「我誤判、我恐懼、我行山」一度成為潮語。
徐少驊轉軚稱反違法爭民主
徐少驊更忽然180度轉軚，喺接受傳媒訪問時聲稱反對以違法手段爭民主，邵家臻當時更話對方係因為生意問題而「被迫」變臉，「我覺得佢好痛，佢係相信佔中喎。」
邵家臻雖則自首咗，但佢喺罪成等候判刑期間就不斷賣小強，一時話自己有糖尿病，一時就喺立法會大會上扮可憐講所謂「告別宣言」，想個官判刑時輕手啲，醜態畢現。
好嘞，毫無口齒都未夠衰，仲敢出嚟「指點江山」先夠厚面皮。反對派連日抹黑逃犯修訂條例，「錢死士」近日就走出嚟話修例通過，「『一國兩制』就會結束」，所以「考慮」3年內同家人返加拿大。咦，佢好似冇交代，其實佢回流香港時有冇放棄其加拿大護照噃，如果未放棄，咁佢哋都係「返祖家」啫，做咩講到咁大犧牲咁？
CY就喺fb出帖寸佢：「『佔中』潰敗，為什麼？關鍵原因是多數主事者只有口水沒有擔當。......《蘋果日報》關於錢志健的報道，只介紹他是『2047香港監察』召集人和資深對沖基金經理，沒有重提錢先生另一個嚇人的身分（份）：『佔中十死士』之一。」
咁驚逃犯例 仲留港等3年﹖
CY回帶道：「2013年4月28日，所謂『佔中十死士』和『佔中三子』見記者，表示『他們決志參與佔領中環，事後將主動自首並在法庭不作抗辯。』錢志健自首了嗎？沒有。在『佔中』期間人間蒸發。所謂『十死士』，除了邵家臻外，還有誰自首？」
CY質問：「現在錢志健以為大家不記得他當日的承諾，今天又指指點點，可信嗎？錢先生，你真的擔心『逃犯條例』，為什麼敢在香港再等三年？」
佢仲話：「請錢先生離開香港前告知大家幾時離開，我會去信入境處要求入境處在機場收回你和家人的身份證。為了你和家人的安全，你不應回來，你也應該知道，你的外國護照並不保證你有權進入香港。」
■香港文匯報記者 陳川