為咗催谷今日反對派舉行嘅反修例遊行，銅鑼灣書店前店長林榮基突然話要「流亡」台灣，仲不斷接受傳媒訪問，號召反對派支持者今日上街。不過，反應就似乎唔多好噃，唔少網民都鬧爆佢既然講到阻止逃犯條例修訂對香港咁重要，點解佢自己走先？有人就話反對派成日聲稱修例旨在針對在香港的「政治犯」，但點解個個反對派大佬都冇走到？有人直言佢只係做騷谷人上街啫！
「叫人留自己閃」 被鬧走佬懦夫
林榮基話自己「流亡」，聲稱逃犯條例的修訂是「將『大陸法律』拎嚟香港用」，又叫反對派支持者今日上街遊行。即使唔少真係信佢着草嘅網民，都對此感到不滿。「朱錦春」就話：「充分表現獅子山下既（嘅）中產精神，叫人留低，自己就有事速逃。」
「Thomas Markar」亦鬧：「做咗，講咗，驚就唔好講唔好做，要拉要鎖隨便咁就（係）硬漢，而家驚有下文就走路（佬）仲（唔）係懦夫？」
「Chi Ho Chan」就回帶當年旺角暴動疑犯李倩怡逃到台灣後，林榮基叫她回港受審一事：「林榮基真係幫唔落，之前講到咁堅話李倩怡返港坐完監出獄後大好前景。」
「Chak Keung Eric Lau」罵道：「啲老seafood就係咁，對後生仔就話坐幾年啫，出嚟仲大把世界，自己有事就即閃，呢啲咪所謂幫我地（哋）爭取民主既（嘅）『泛民』垃圾囉！」
「Fung Thf Tsang」就話：「無事無幹咪偷偷地番（返）嚟囉∼ 我而（??）家越嚟越討厭D（啲）老嘢！」
有網民就質疑，如果修例真係針對反對派口中嘅「政治犯」，咁要走都未輪到林榮基啦！
「Hon-tai Hung」質疑：「林榮基點解要逃走到台灣？反而，反對派一個人都無走到？咁即係話畀市民聽，呢條例係攪（搞）啲犯左（咗）法而逃避法律責任的人，如果無犯法，使乜驚呢？」
網民識破伎倆 博同情難得逞
「Quinson Wong」笑言：「即是話，有引渡條例，蛇虫（蟲）鼠蟻唔敢藏身香港。未通過已經work，修例原來係好事來的。」「王有成」則直指：「高調離港，想制（製）造恐慌，引人注意，反對派技（伎）倆，如真要走也不急於這時候走。」
「Thomas Fok」就「提醒」林榮基：「既然老細安排老林（臨）做着草老人家一角，博世界同情。不如玩大D（啲），自己加戲。在台灣媒體前，剪爛香港身份證及特區護照，以表心績（跡）。」
有人則以子之矛攻子之盾，話如果內地執法部門真係好似香港反對派口中講咁「無法無天」，就根本冇需要整條移交條例出嚟。
「Jamie Manning」話：「其實以引渡（移交）修例為理由走佬唔太合理，因為等個修例立法後再去引渡，程序複雜費時，而且等同即刻攤牌話比（畀）人知引渡（移交）修例就係為左（咗）拉『政治犯』，對『中共』對香港嘅形象都冇好處，『中共』真係冇咁蠢，就算真係要拉都係用返『洗頭艇』啦，方便快捷。」
■香港文匯報記者 陳川