■吳廷燁表示自己性格很害羞。《鐵探》明晚播結局，作為2019年暫時最高收視的劇集，結局篇一定會引起極大回響。劇中除了惠英紅奸到出汁外，飾演越南黑幫山狗big boss「營長」的吳廷燁也獲網民激讚夠晒殺氣、夠晒心狠手辣。這是吳廷燁三十六年後重返TVB拍劇，為了這個劇，吳廷燁損失了最少7位數的內地劇機會，又被TVB壓了一半價錢。今次還了心願後，吳廷燁笑言下次再拍TVB劇，要認真考慮一下。■採訪：植毅儀／攝影：潘達文
58歲的吳廷燁原名吳玉壽，大家都稱他做「壽仔」，與梁朝偉、周星馳及吳鎮宇同是TVB第十一期藝員訓練班出身，當年因為年少氣盛，完全不懂得權衡輕重，為了拍拖而失約TVB，繼而不獲TVB簽約而輾轉去了亞視發展。說起30多年前的事，吳廷燁都感慨自己當年太衝動，浪費了機會。
「年輕時自己性格是衝動派，當年剛拍拖，TVB訓練班畢業前要考畢業試，然後女朋友同我鬧分手。初戀喎，好傷心，影響了心情，公司(TVB)叫我們一班訓練班全部同學在泳池邊為《碧波樂悠悠》演出當啦啦隊，我心情唔好，心想都唔少我一人啦。點知當日很多人缺席，沒有出現的同學，即使畢業試成績不錯，TVB都不會簽，因自己缺席了這個節目，所以便離開了沒簽無綫，入了亞視當藝人。之前輾轉回內地拍劇，外面拍電影，也沒有機會回TVB。」
還心願被TVB壓一半人工
吳廷燁唔出聲時樣子很惡，但真人十分Nice。他表示自己其實很怕醜，很少做專訪。於亞視多年，八十年代尾至千禧年，是他最開心日子。之後亞視多次改朝換代，亦令他感到沮喪，甚至轉行出去做金融經紀工作，之後，發覺工作與本身性格格格不合，最後又返回演藝工作上去。今次拍《鐵探》，不少對手都是在電影界的老拍檔，所以拍攝過程十分順利。
「入了亞視23年，見證亞視最光輝年代，之後亞視換了幾次老闆，歷盡滄桑。一直以來都有人叫我走，但我內心都十五十六，總覺得外邊風大雨大，人工又不及亞視高，走一走咗之後可能分別不大。當初見到老闆邱德根走咗，變咗林建岳，之後每兩三年換一次，人也漸漸習慣，只對自己說：『不怕，要成功，就只有努力』，其實我每個階段也成功過，好似《洪熙官》在大馬、新加坡播時大受歡迎，報紙、雜誌都說我演得好，雖然我唔識打，但一樣同甄子丹打到飛起，似模似樣。到後來《精武門》、《殭屍》都有回響。在亞視做藝人，上到一定的位置，跟住突然改朝換代，撻返落嚟，又要由零開始過，由最普通嘅角色做起，係幾大打擊。所以之後去了內地工作，咁多年來其實都做得唔錯。像今次拍《鐵探》，最後十日超時，又唔可以放我返內地拍攝，搞到我損失了７位數的人工。我咁耐以來都沒有找經理人去幫手，傾約又差，本來同TVB開一個價，點知最後壓了我一半價，就當還自己返TVB拍嘢的心願。」
拍拖７次未開花結果
單身多年的吳廷燁努力工作搵到不少錢，閒時就是和一班相熟老友如偉仔、張兆輝去滑雪飲紅酒，近年由半山豪宅搬回黃大仙鳳德邨公屋與93歲的母親同住，只因方便照顧老人家。咁多年都孑然一身，外間相傳吳廷燁暗戀張文慈多年，他立即否認，並指多年來有拍拖，只是緣分未到可去到結婚一步。吳廷燁更大爆於內地工作，有不少年輕美少女主動投懷送抱，但自己不想和女友年齡相差太多。
「大家一直誤會了，我同文慈相識多年，但我從沒有暗戀佢。我們是好好的朋友，是我這麼多年還會聯絡的異性朋友，我們之間從來沒任何事情發生，但所有人都不信。咁耐我都只係有過六七個女朋友。早幾年在內地發展時曾有女朋友，可惜最後未能一起走到終點，其實我都有不少妹妹仔主動向我示好，但我過唔到自己嗰關，相差成廿年。未來遇到情投意合的人，仍會嘗試發展，我都期待會結婚的。但女方唔可以太細，我想相差最多十年好了。近年從半山寓所搬返母親黃大仙居住，方便照顧媽媽。我媽咪九十幾歲，視力唔好，煮嘢食煮唔到，又出唔到街，要人睇住。一日三餐以至家務日常都一腳踢。以前佢照顧我，現在我咪盡返做仔的責任。現在我沒車沒樓，反而好輕鬆，出去飲酒又唔怕部車沒人理。」